沒上街的日子

12月到1月一直冷，平時下班回家天又黑又怕路面結冰一定早早回家，但即使在週末天晴的日子，氣溫仍是徘徊在攝氏零度附近，我們多數瑟縮在家，沒必要都不外出。

不知是否坐在家太無聊，不知不覺在網上買了比平時多的東西。

昨天在香港雜誌看到Furla今季新手袋。老實說，我很不喜歡拿手袋，平時跟老公外出，我一定兩手搖搖，更不是捨得萬萬聲買手袋的人，但看到這個袋型可以，我選的是鮮綠色，非常春天，價錢更比香港平五百港銀，拿來上班心情會更愉快。

繼續在Etsy.com尋寶，找到這雙冷手襪及冷圍巾，就是喜歡顏色的配搭。

其他都是冬季減價貨，幾年沒買過皮褸，喜歡這件夠淺色。

另一件是Anthropologie的聖誕特別版冷外套，半價後也要過百美金，雖然不可以常穿，但我對特別花紋或圖案的冷衫有偏好，年輕時不知花了多少金錢在United Color of Benetton上！

就當祝自己生日快樂吧！

本來還想買鞋，等下個月吧！

凍到亞媽都唔認得

今次都要用廣東話，因為除咗用「凍到亞媽都唔認得」嚟形容呢個冬天之外，我都唔識點形容。

經過埋今個星期初嘅東南部風雪之後，美國50個州已經證實有49個州有雪蓋地。仲有邊個州咁好彩未中招？哈哈，唔係夏威夷，而係佛羅里達州，不過前一排佛羅里達州都凍到攝氏零度，攪到啲士多啤利同蕃茄貴哂。

因為今年係La Nina現象年，冬天嚟之前，氣象學家已預告今個冬天會好凍，點知12月初一到，已經比平時凍好多，到月中，歐洲同美國平時唔會咁早落雪嘅地方都已經勁落雪(記唔記得留學英國啲細佬返唔到香港呢!)。


我哋美國東南平時就算落雪，都會到1月中/尾最凍時先落，今年聖誕就落咗鑊勁，好在近假期，我老公喺屋企，佢好快就剷完啲雪，之後幾日都車我返工放公，唔駛我煩。

今個星期就慘喇，星期一中午先落，老公一早已經飛走咗，得我一條友，返緊工落雪攪到我好緊張，地面一開始積雪我就走人。跟住成晚落足一晚，又雪又冰雨。

第二朝可以留喺屋企返公，但我都係要下晝返公司一轉，諗咗好耐剷唔剷雪，因為老公話如果無三四吋以上，唔剷就咁車過去都得，但係我屋企門口條路仔陽光唔到又有少少落斜，唔剷啲雪過咗夜就會變冰，今日唔跣第二日都會勁跣。

最後死死地氣，都係剷一邊，等我自己架車出到，剷呀剷，剷完係出到車，不過對手已無力提起又勁震，都係要返工。琴晚瞓覺左瞓右瞓條腰都好似斷咗咁痛，食咗止痛藥都係咁上下。老公架車嗰邊依家有幾吋，全部都係冰，佢星期四晚返嚟都唔知點算。

就係因為勁凍，所以即使啱啱過咗生日係週末，我哋都係乜都無做，嗰日由朝到晚都係攝氏零度以下，屋企有暖氣，長期攝氏21度，你話我點會無啦啦走出街捱冷吖。今個冬天乜地方都無去，簡直冬眠一樣。

講開暖氣，我哋用煤，淨係12月已經200美金，其實已經唔算好勁，但係往年12月係頂多百鬆啲，仲未計電費呢。唉，仲有1月同2月嚟緊呀！