偏食狂

呢篇破例用廣東話，因為咁至傳神。

我老公係一個偏食狂。

可能你哋會話，外國人係咁，好多嘢都唔食。

我都識好多外國人，住喺香港同世界各地都有。

喺我成世女認識嘅所有人之中，我好肯定，我老公係最偏食嘅一個。

先唔計亞洲食品，就只講一般西方食物，佢唔食嘅包括：

蔬菜類~

青椒 洋蔥 青瓜 椰菜 紅蘿蔔 西芹 椰菜花 任何菇類 任何瓜類 任何黃豆製品(包括豆腐 豆芽 支竹) 茄子 蔥 莞茜

生果類~

大部份生果(只吃士多啤梨、西瓜同香蕉)

肉類~

羊肉 (雞牛只吃雞胸及牛排無骨嗰啲)

海產類~

帶了 蜆 青口 龍蝦 蟹 魷魚/墨魚 蠔 鮑魚 鰻魚/蟮 魚只吃魚排

其他類別~

煎蛋 烚蛋(只食炒蛋) 任何內臟 果仁 任何湯類(亦包括有湯的粉麵)

(註：以上只係我一時記得嘅一啲，仲有好多其他嘢佢都唔食架。)

以上已經唔計各種喺亞洲先有嘅其他奇怪食物，你可以想像同佢返香港食嘢喺幾無癮！

舉個例，我好恨打邊爐。舊年返香港第二晚，我同佢兩個人去咗稻香，叫咗六、七樣嘢，兩個人已經算好多。點知佢淨係食牛肉，最後俾面食埋幾舊栗米，我一個人對住其餘四、五碟(都係魚片、菜之類正常嘢)，好無奈又好無癮，本來好期待去打邊爐變成想快快食完快啲走。

我當時真係沮喪到有諗過自己係唔係揀錯老公。唔係誇張，因為我本身好鍾意食嘢，依家淨係對住佢，食嘢對於我嚟講已經無以前咁興奮。

亦因為佢嚴重偏食，我好認真同嚴厲咁同佢講過一次，去到香港同本地人食飯，就算幾唔想都要樣樣食啲，因為唔肯食就係無禮貌同唔尊重我哋文化。第一次同我屋企人食飯，我哋去咗鳳城食一圍普通家庭合家歡宴，有熱薰魚翅嗰種，你可以想像佢食得幾慘！哈哈！

但諗深一層，你見過幾多外國人唔食青爪、青椒、西芹、紅蘿蔔、椰菜同埋洋蔥？一樣半樣無所謂，但樣樣都唔食，如果係你，你都唔會煮飯佢食！

如果佢係我個仔，我一早打爆佢個頭！