唉，原來媽媽另有想法。
話說我這個小朋友從出生開始，一直都是跟其他哥基犬住在戶外狗房，隨了出賽訓練外，很少接觸人，亦很少聽人類語言，隨了聽得明自己的名字外，其他都不太明白。
媽媽說，當我適應了新生活，對爸爸媽媽有安全感後，就要帶我上學去！
其實我也很乖的，從不倒亂，還有點膽小，為什麼還要上學？
媽媽說，不是要我學什麼雜技表演高難度動作，但一定要學會一些與生命安全有關的指令（例如老遠叫我stay，我就要stay好，或者地上有東西吸引我去吃，媽媽叫停我就不可碰）。因為我非常跟尾狗，永遠痴住媽媽的腳，要stay實在有難度！
其實返學也有好處，平時媽媽是一定不會給我小食的，但返學時或在家練習時媽媽會不停餵小食，簡直是狗間天堂啊！
但返學也有另一慘慘事，話說另一課的老師本身也是競賽哥基犬主人，第一堂見到我就來逗我玩，但卻靜靜的跟媽媽說我太肥了，要減肥！
有無攪錯？我已經無啖好食，仲要減？
由那一天起，媽媽就在我早晚兩餐，由每次半杯狗糧，改為三份一杯，每次只是丁點點，好可憐呀！我連便便都減少了！無陰公呀！
主人肯花心機教狗狗, 真的很好...很多主人只是貪得意, 出到街由得狗狗亂走亂撞...好危險呢...相信Blaze將會更乖巧呢...
回覆刪除[版主回覆10/22/2011 01:27:04]Blaze一向出街都幾乖，唔會扯狗帶又唔會亂跳，小朋友衝埋去佢度都無問題，所以我一向唔驚佢會嚇親人。我反而驚佢自己唔覺意走失或者走出馬路，到我哋搵佢時佢乜都唔理就衝埋嚟俾車撞倒，所以一定要教識佢我好遠叫佢stay佢就要stay好，同埋街邊嘢唔好亂食（呢樣真係最難）。點都好啦，盡人事。
Blaze, 你唔知你媽媽係個有要求嘅人咩?? 我成日話佢係港板劉慧卿呀!! 哈哈~
回覆刪除[版主回覆10/22/2011 01:29:10]Ta姐，你唔好咀樣話我媽咪啦，佢話劉慧卿個樣咁惡唔似佢喎，媽咪每日抱我攬我時好溫柔架。
不過你又真係幾肥嘟嘟, 可能好吸收呀!!
回覆刪除[版主回覆10/22/2011 01:31:50]我好叻女，幾個星期減咗兩磅喇，依定就冬天毛毛厚啲先似肥嘟嘟咋，媽咪話仲要減多兩三磅喎，慘慘！
Hahahaa,要佢減肥真係好辛苦。
回覆刪除[版主回覆10/22/2011 01:32:37]佢自己唔知食少咗架，因為哥基永遠都肚餓架。
吾知係咩杯呢,因冬冬都係每餐半杯,一日2餐都ok呀! 冬冬食addication 鹿糧,我覺得食雞會易肥d架^^ 其實冬冬見到人會跳高say hi 架,我都好頭痛依樣,但叫佢stay 佢又ok架喎..可能佢本身太過熱情了.
回覆刪除[版主回覆10/22/2011 01:40:08]係普通煮食用量杯，其實三分一杯真係得啲啲咁多，佢三十秒就食哂，每日兩次便便減少到一至兩粒仔（以前未減時有兩三粒架）。如果佢無敏感，我想佢繼續食雞，因為雞糧營養均衡啲，最多食少啲囉。我Blaze好鬼懶，連我哋放工返屋企佢都唔跳架，淨係走埋你前面坐定定等你烏低同佢say hi，我依家有時玩佢，唔烏低唔啋佢，等到佢唔耐煩跳一吓先摸佢，想佢自動自覺跳真係難呀！