29/3/2014

繁忙的往日 - 香港電台歲月(下)

上兩回寫完每週製作一個節目的主要流程,大家都應該感覺到這樣的流程,每個星期都會過得好快,每日都是在倒數下一個死線(節目播放日)

雖然對我來說是個全新的工作種類,但周圍的同事都非常專業有經驗,做了兩三個月已上手,算應付自如了,也不特別緊張了。

但世事當然不會如此順利,大約在入職三個月之後,有一天節目監製(即現時的助理處長施永遠)突然召我入房,說廠導演會升職但同時調組到「頭條新聞」,我們卻不被分配另一廠導演,問我可否同時兼任廠導演加我四千元人工?!

錢,從來都不是我考慮工作的主要因素,我老實對監製說,我完全沒有任何電視製作經驗,而這些經驗知識都是很專業不可/不應由門外漢亂來的。然而,監製的所謂詢問其實只是知會,基本上沒有討論餘地,他只說對我有信心,我有一個月時間跟現廠導演實戰訓練(即四集),一個月後正式接手。

我不是閒著沒事做純粹受訓,報紙要睇,稿要寫,跑腿繼續做,而廠導演仍是要在出街日上午錄影,下午埋版,日程緊湊,當然沒有剩餘時間與心機跟我這個對專業名詞及技術全無認識的人逐一教解釋。每個星期的優先,仍是準時把節目弄好播放為首,我連問問題的時間/膽量也沒有,所謂訓練,其實只是在旁觀察,一個月眨眼就過了。

其實節目播放日上午,當我與撰稿人在寫稿時,廠導演會更早到錄影廠做準備,佈景雖然已搭好,但打燈試鏡頭等都需要時間,廠導演亦會預先與主持或嘉賓打招呼簡介流程,這都是平時我們在三樓趕稿時導演已準備好的。

所以,到我一人當兩角色時,除非我有三頭六臂或者都敏俊的停止時間或瞬間轉移技能,我是一定無辦法同時在兩個地方工作。要完成同樣的工作,代表我要更完成稿件,有時完成自己的部份也不會協助撰稿人而要直接走到錄影廠做準備,開廠的時間自然延遲了,可錄影的時間亦縮短了(主持吃午飯時間一樣嘛)

你想像得到我第一次負責錄影,控制鏡頭的三隻手指(左手中間三隻)有多手震?兩個經驗主持是不會因為你是新人而容許你NG或按錯鏡頭的,全廠人,尤其是三個攝影師一直聽你下指令控制鏡頭角度、聚焦距離等,在錄影日廠導演就是全廠領導人,所有人都要服從,極有權威亦極受尊重,當然好主要原因是因為廠導演亦是錄影及埋版的最後負責人。

我好幸運,在香港電台這個環境經過這個經歷,港台的錄影廠技術人員都外判香港電訊(當年我們仍叫「大東電報局」)。大東的哥哥大叔們不單只個個經驗老到,更難得的是性格隨和超好人。亦可能是可憐我這個24歲的菜鳥臨危受命,個個都對我好好又有耐心,會主動告訴我細微的錯漏或瑕疵要知道他們絕對沒有義務這樣做,因為這些都是廠導演的主要工作。除了廠的同事,兩個主持及撰稿人亦很好人對我很有耐性,即使可能我發出的指示都不是用他們聽慣的專業詞彙。

下午埋版的另一組同事亦一樣,對於我這個傻吓傻吓束手無策的新人特別保護,很多我聽不到、看不見的瑕疵都不厭其煩主動幫我重複又重複地調教又會自動為我設計適用的影像合併效果。我想我唯一的長處是中美語流利,埋版時為中文故仔按英文字幕的時間準確性夠高。但因為除了坐在導演座埋版,我同時仍然是跑腿,所以我們埋版時,時常會出現「全廠停工等導演」走上走落的獨特狀況,我相信大東的哥哥們對我超好,好主要是因為他們也看不過眼我同時做兩份工的狀況,這個安排在我未入職前從沒有發生過。(每次埋版我都會請下午茶也幫助不少)。而且,廠導演在電視台是很資深的工種,通常都是由已拍過多年故事的編導轉職調任,絕不會讓一個門外漢冒險,我這個大剛才畢業的門外漢,當年成為全電視台所節目最年輕的「o靚妹」廠導演!

在之後的歲月,每星期繼續打仗,好幸運未試過有意外或影響節目出街,我亦試過三幾次沒有稿件的現場嘉賓討論錄影(每次會覺得自己會心臟病發死)。老實說,要兼顧導演工作,我之前的撰稿工作質素一定會受影響,即使沒有大退步,也不可能鑽研改善提昇,取捨是必然的。

眨眼一年就過去了,工作上手了,監製有問我是否有興趣拍故事,我有跟中文傳媒春秋的編導出去拍攝採訪,亦有試過自己拍攝採訪,但仍然要兼顧兩個角色又不是很資深淡定時,實在不能再分心/分身/分時間去拍故仔。

我在港台只工作了13個月,在這短時間我的節目轉了四個監製、三四導,兩個廠導演,基本上除了外援撰稿人及兩個主持外,其餘職位都是車輪轉節目一向是雞肋,不可以不做但又沒資源沒話題觀眾不多,自然留不到人才。我一年之內要不適應各新老細的做事風格,到最後終於忍受不了第四個不負責任的老外監製,一星期到節目埋版日才現身還要一身酒氣指指點點。我向公共事務部大老細要求調離英文組被拒,就辭職不幹了。在港台的日子也是我剛與第一任老公分居的日子,居然捱到一年我覺得自己好強。

做電視台除了壓力大工時長,也不能病,每組人手一隻手數得出,個個有自己職責,任何一個病了也會影響節目出街。我試過節目出街日有病,一直忍痛到埋版併貼最後工作人員名單頂不順去急症室,但你沒可能那天請病假,難道叫市民晚上看一段黑色20分鐘?我經痛又嚴重,一年總會遇到錄影日經期第一天,要跑上跑落精神又緊張只會愈來愈痛身體亦會愈來愈差,所以不再做電視台也不是壞事。

雖然我只在回歸前做了13個月,但得著好多,對自己工作的責任感、能力及領導才能的肯定固然重要,更難得是在短時間認識了一班志同道合的知己,因為我年紀輕,他們都是我的老闆們、長輩們,但對我都非常好,直至今時今日大家都已是高層或退休,我每年回港仍會與他們聚首吹水,純粹為了這些友誼我已覺得收穫寶貴。

辭職時,其實已收到通知,之前一年考政府工會請我做行政主任,我亦同時拒絕政務主任的進一步面試(都說我無大志),以為終於可以休息做個閑暇白領。但我早期工作運不佳,入職政府後第一份工作,居然是我工作廿年來最辛苦、最大壓力、最多責任、最長工時,亦同時是見識最多、滿足感最高的一份工作,將來有機會再同大家分享。

最後送上兩張珍貴相片,這是我最後一個錄影日,頭條新聞一個同事幫我拍下作留念。第一張是調教錄影機、第二張是我早上錄影時的情況,面前就是我要控制的控制台,旁邊的是當時的編導,最右邊就是主撰稿人,還有看不到的是我們面前一排排的螢光幕。



16 則留言:

  1. 做呢行壓力真係超大呀。 題材又敏感, 時間又要分秒不差。

    回覆刪除
    回覆
    1. 係呀,第二張相啲報紙旁邊有個黑色計數機,係專用嚟加時分用嘅time calculator,所有廠導演都會時時刻刻用住,不停加加減減每一個環節,調整再調整,呢度長咗三秒,第二度就要減三秒,全日都喺度計住幾多分幾多秒。

      刪除
  2. 雖然話錢並非妳嘅"考慮主要因素"但加四千蚊而要一人擔當兩職,感覺好似對這廠導演一職不大尊重,又或者妳上司覺得會選用門外漢已經係前無古人後無來者嘅賞識吧!

    回覆刪除
    回覆
    1. 成件事,我最無諗,就係嗰四千蚊,又或者係唔係加得唔夠多。如果要計,根本就唔會容許唔係讀新聞出身,無做過intern,無任何TV technique training嘅人做廠導演,我諗我係前無古人(係唔係後無來者我就唔知)。我都唔明點解監製會咁決定,一來可能真係唔重視英文節目,知道無人睇,二來可能覺得我頭三個月做得好好,學得快,夠淡定。總之,係一個好奇怪嘅決定,如果唔係,廠啲哥哥們都唔會咁幫我。

      刪除
  3. 那些年,經驗和機會特別多,只要自己幸付出和努力。

    回覆刪除
    回覆
    1. 你講得啱,八九十年代,機會真係特別多,如果你夠薑,又做足準備,係比較容易突出自己嘅。不過我嘅經歷仍算少數中嘅少數。

      刪除
  4. 咁重要嘅職位,點可以求其俾四千蚊叫人頂埋,好似有點兒嬉。

    回覆刪除
    回覆
    1. 錢唔係個重點,就算佢俾埋個導演嘅人工我,我都仍然唔夠班,仲差好遠。其實到後期雖然我都識得用好多專有詞彙,但係我唔係專業出身,只懂得表面下指令,你問我各種詞彙背後嘅道理/原理,我係唔識嘅,因為無讀過亦無人得閒教我。

      係幾兒嬉,不過監製可能心裡知道,我一定有足夠嘅人幫到我。我做廠導演咁耐,佢好似只係喺控制室出現過一兩次咋,真夠膽。

      刪除
  5. Ceci:
    ~要廠導演要得咁急. 做咩唔係出面請個有經驗!
    ~但上頭都係睇得你起, 招你入房問!不過, 感覺你做得幾吃力.
    ~我有興趣聽你政府工 (行政主任). 因我當年畢業時, 身邊好多長輩叫我返香港申請做政府工.

    回覆刪除
    回覆
    1. 廠導演咁專業嘅職位,任何電視台從來都唔會喺出面請架,一定係台內人慢慢做,慢慢升嘅,通常啲廠導演都過四十歲做咗十幾年,好似我咁廿歲出頭只係做咗三個月可以話係奇蹟。我監製一係太睇得起我,一係傻咗,其實當時全個公共事務部其他同事都覺得好怪,好在我未衰過。

      我當然覺得自己做得唔夠好,淨係要包保個節目出到街已經好難,想個節目有進步更加係無可能,可能就係英文節目太無人重視,更加速我離開港台。

      刪除
  6. 大東的哥哥們不單只個個經驗老到,更難得的是性格隨和超好人。<- Somehow I am always under the impression that co-workers in HK aren't very helpful to each other.

    回覆刪除
    回覆
    1. 點解你會咁諗?其實香港人唔單只聰明勤力,仲好有義氣有同情心,我覺得相對起美國人好好多。美國人表面友善好人,但實際地肯為其他人付出嘅唔多,亦都唔太著重"team"嘅重要性同價值。喺香港工作雖然競爭大同埋乜都要快,但唔代表會改變人性。我喺香港十幾年工作經驗都係覺得香港同事好好多。

      刪除
  7. 工作上d嘢好多時都係煮到埋離就食, 克服到又係另一個新天地了. 我有個朋友响李+x間電台做, 初時明明係做marketing, 點知有一日老頂提議佢不如做幕前(基本上都唔係提議, 佢唔肯的話連份工都不保), 就咁樣開咪做咗dj, 轉眼間一做都做咗成十年咯.

    我宜家份工都係, 邊有諗過我呢個讀Communication加英文既人會响一間bio tech公司既R&D dept佔一席位? 我係同事中唯一一個非engineer, biologist, chemist或physicist呢.

    回覆刪除
    回覆
    1. 幕後轉幕前行內都好常見,畢竟香港無乜幕前人才提供源頭。

      我成日覺得,除咗做醫生,我乜工都做得架,只係上手時間長或短嘅問題。

      刪除
  8. 我都係港台電視部做过, 唔知有無同你合作过?

    回覆刪除
    回覆
    1. 多謝到訪留言。

      如果從我寫的內容與以上相片你認不出是誰.....那我們應該沒合作過。

      刪除