Blaze:我一日瞓好多架

各位哥哥姐姐，好耐無見，大家好嗎？

我OK啦，繼續日日食同瞓，有時去吓散步。

媽咪好嚴，成日唔俾飽飯我食，但係啱啱去完週年體檢，獸醫話我好健康，又維持28磅多少少，讚我好叻女呀！(其實完全係屋企Tiger Mom嘅功勞啦！)

點解媽咪唔俾飽飯我食？Well………媽媽知道我係大懶蟲，一日瞓到黑，雖然每日出兩次街去放低幾兩，但都唔行得好耐，如果仲俾飽飯我食，佢話我一定會變大肥豬！

每日媽咪返工來回十個鐘，我多數瞓咗。媽咪放工返嚟喇，同我傾吓計，玩吓，食晚飯，散步，跟住八九點媽咪就會自己食飯同開始睇電視上網。

我有時癡住媽咪腳底囉，但有時我又想瞓好啲，咁就走翻入自己間屋大覺瞓，你睇我幾爛瞓？

差唔多十一點，媽咪叫我去多次便便，食埋好味嘅維他命，就會跟媽咪入房。入房做乜？梗係又大覺瞓啦！媽咪自己睇書時，我已經在軟床床zzzzzzzzzzzzz………

你話啦，如果媽咪俾飽飯我食，我仲唔肥到腳都見唔到咩！

同場加映，我又去沖涼涼呀！次次姐姐都話我乖架，今次送咗條圍巾俾我(其實我係女仔應該攞蝴蝶仔架)。我呢啲有家教斯文女嚟加嘛，梗係乖啦，你睇我做完Spa幾靚女，仲香噴噴添！

同場再加映：我叔叔Andy呀！

爺爺嫲嫲舊年年尾又養翻貓咪，今次揀咗ragdoll，貪佢哋靚仔得嚟又溫純，呢張相舊年聖誕去嫲嫲度過節時影架，佢當時幾個月大仲係小朋友。你睇佢啲腳同爪爪幾粗壯，佢大個仔時有成廿幾磅架，咁咪同我差唔多咁大？咁我點做大家姐呀？

我都同佢同住過幾次，同佢相處ok啦，又唔算好好朋友，但亦唔會打交，基本上各自玩囉。你都知我一向淨係鍾意人類，唔太好其他動物架啦！我最討厭同羨慕Andy就係佢可以自由自在走上走落二樓，又可以坐梳化，我唔俾架，激死！同埋我最憎媽咪抱佢，我即刻發難勁抓媽咪抗議架，唔係你估我無料到！

今次講住咁多先，我要去瞓喇！