Blaze：我的怪習慣

又係我呀！媽咪話我比較受歡迎，要多啲出場。

我係一隻好乖的狗狗，從不吠叫，從未試過大小便出意外，又未試過咬爛嘢，爸爸媽咪有時唔得閑過哂餵飯便便時間我都唔會亂嘈亂走，真係人見人愛架！
不過媽咪話，如果我形象太完美，咁就好似過份咗啲，所以要揭我私隱，將我兩個怪習慣公諸於世喎。

1) 用生命測試媽咪記性

媽咪通常只會喺兩個地方食飯，一係梳化，一係細飯廳。我好乖，唔會跳起或者亂叫問媽咪攞嘢食(媽咪都唔會俾)，但我係十足跟尾狗，媽咪去邊我都跟住，如果媽咪坐梳化，我就會伏喺梳化底媽咪腳邊。

但如果媽咪坐細飯廳，我就會做一樣「藝高狗膽大」動作，嚟表達我對媽咪嘅一級信任度，你哋睇吓！

要癡住媽咪，梗係有咁近坐咁坐啦。媽咪一坐定食飯，我一係爬喺媽咪張凳後面，一係爬喺佢凳底。你見唔見張凳有碌碌呀！如果媽咪唔記得我喺佢腳底而突然起身攞嘢，甚至只係向後郁一郁，我都會俾佢「車」到架！

就算有其他人一齊食飯，我都只會靜靜坐喺媽咪凳底。媽咪成日鬧我，如果有一日唔記得或太興奮向後郁，「車」鬼死我喎。媽咪，我好信任你架！有時媽咪確定唔到我坐喺邊個位，個頭喺邊度，佢食完飯要起身時就會一邊叫我，一邊好慢好慢向後移少少，等我知道要行開俾媽咪起身。

2) 我的保險箱

我都幾得寵架，成日都有玩具玩。但如果買毛毛會發咇咇聲嘅公仔俾我，我就會第一時間咬咬咬，咬開哂啲毛毛，再搵個咇咇出嚟咬爛佢，咁就玩完架喇，通常十分鐘必定攪掂。

雖然咁玩法係唔慳家，但媽咪知道我鍾意咁玩，都仲會買新玩具俾我架。不過我最唔鍾意就係咬完之後，媽咪就會執起哂啲屍骸掉落垃圾桶！媽咪，幾爛都好，啲玩具係我架，你做乜掉哂佢喎！

依家我醒目好多喇，所有玩具唔理咬唔咬得爛乜種類都好，第一時間收埋媽咪床下底，最好仲係收到中間，咁就好安全喇。你睇吓，我啲寶藏呀！

嘩，媽咪你做乜爬底望床下底呀？你想點呀？你乜都見唔到，乜都見唔到！

(媽咪後話：傻瓜Blaze，媽咪其實一直知你收埋啲玩具喺床下底啦！雖然好窄，但媽咪真係要爬都爬到去中間架，不過見你當啲爛玩具如珠如寶，又唔阻住地方，媽咪隻眼開隻眼閉啦。)