去年冬天暖，穿得擁腫的日子不多。今年就回復平均攝氏0 – 10度的氣溫，早晚上班還是要穿多點。
我不太喜歡冬天的服飾，所以冬天一向少買衫。幸好網上基本上一年四季都有春夏裝賣，我要買仍是主攻春夏裝。
Loft跟Ann Taylor就好像香港的G2000或Playlord等，如在美國而又身型細少的話，是比較容易找到不用修改的上班服飾，而且算便宜，打折後通常三幾十美金一件，是我平時上班常穿的制服牌子。
上次提到喜歡Anthropologie但厭貴又不減價，剛好一月份生日收到9折卡，難得有折就去買了幾件，喜歡Anthropologie民族得來又不會有不修篇幅難撻撻的感覺。
連續見到兩件黑底波點衫，都知道今年興波點。我以前很抗拒波點，覺得太可愛太少女，但現在人老嘛，愈老就愈想扮細路女，今年第一次買波點衫，還有下面兩條波點褲！昨天穿了白色那條襯黑色樽領冷衫，出外時還有點猶豫，但牙醫護士很喜歡說我的衣飾令她很「開心」！我就當是讚賞吧。
Mod Cloth終於有春夏裝賣了！我這個忠實花花迷當然不會錯過。外套是沙丁(Satin)質地，實物比相片的色彩更艷麗，襯上白背心白四個骨褲當堂精神哂！條花花裙好靚，質地又好，可當裙著也可以加leggings，裙身闊了一點，待我回港時會找人改窄一點。
最後是鞋。不知是否在美國少走路，連買鞋的興致也減了很多，我以往買鞋買得好狠，幾千幾千一對，很多都是買了沒著過的，現在居然沒有這條癮，戒得好。
戒還戒，日常要穿的鞋還是要買。還記得我說要買定好的金色與銀色鞋嗎？只要色澤靚質地好，這兩隻色的鞋是可百搭任何衣服。我有一對在港買的銀色Moschino，著了多年都仍然新淨亦常被讚，但我怕繼續常穿遲早會變殘，一直想找多一對銀色的替換找了好久，最近剛好被我找到這款Tory Burch銀色閃石蝴蝶鞋，第一次見到照片即有「丁」一聲的感覺！但現在孤寒好多沒有即刻上當，而且我還想買多對米黃色的大路款，兩對不平啊！終於等到President Day減價全場75折，即時乖乖俾錢，米黃色那對已有些斷碼，誰說美國經濟不景！
春天啊！快點來吧！
誰說美國經濟不景: Many Americans and Europeans live on credits/borrowed money, and hence the economic crisis!
回覆刪除[版主回覆02/20/2013 22:55:21]其實美國嘅所謂經濟不景已經完咗, 依家嘅問題係製造業out-source之後啲人長期失業, 就好似80年代香港咁. 不過亞洲人會儲錢, 好多當年無咗份工廠工嘅就返屋企做師奶唔再出嚟做嘢..... 但美國人如果無工返就會即刻跌入福利金層面成為成個社會嘅負擔啫.
美國呢班人雖然你都可以話佢哋都係叫中產, 但佢哋係唔會幾百美金買對鞋. 高消費品銷量其實一直都無乜減過.
The flats look great!
回覆刪除I am too cheap to buy Tory Burch.
[版主回覆02/21/2013 03:17:17]如果係常著嘅款, 例如平底鞋, 我都仍然捨得買. 但係heels或者boots之類唔常著嘅, 我依家就唔捨得喇.
我一路好想買對Stuart Weitzman 50/50 boots, 但係企硬US$595, 以前四五千港紙我會捨得買, 依家唔會lu.
米黃色嗰對Tory Burch 好靚呀， 可惜斷碼。
回覆刪除[Angela回覆02/21/2013 06:30:46]我家姐又係叫我買啲好啲嘅鞋， 襟啲靚啲舒服啲喎。 但我過唔到比錢嗰關。
[版主回覆02/21/2013 06:25:22]你勞動階層? 講笑好!!
你嘅最大嗜好係儲錢就真!! 你要買幾千對都買得起呀!
[Angela回覆02/21/2013 05:48:08]我點會買吖， 我啲勞動階層唔著得靚嘢。 我著花園街鞋一季買好多對都得。
[版主回覆02/21/2013 05:24:09]嘩, 我啱啱再check, 原來大部份sizes都無哂喇(包括我要嘅size), 好在買咗, 真係 買遲兩日都無呀!
[版主回覆02/21/2013 05:20:12]我個size未斷, 已經買咗.
你著幾號? 如果Tory Burch本身個網站斷咗碼, 其他如Neiman Marcus, Nordstorm等網站應該仲有貨, 不過未必減價.
平底鞋係我心水選擇， 自己永遠都著不到高跟鞋。
回覆刪除[版主回覆02/22/2013 22:57:41]我以前喺香港會著有踭鞋, 不過都限於兩三吋, 依家一來要揸車, 有踭鞋唔方便, 二來我老公唔係高我好多, 所以佢唔太想我著咗高踭鞋同佢差不多一樣高, 我所以高踭鞋都係入翻鞋盒lu.
對銀色鞋好靚, 又易襯衫, 不過我著平底鞋雙腳會好攰
回覆刪除真奇怪, 我呢排竟然無咩購物慾, 只買咗套床單被套俾個仔咋
[版主回覆02/24/2013 09:58:31]我依家著高踭鞋就唔得喇，一兩吋都仲OK, 高啲就一定攰喇。
我今個冬天都買唔得多, 其實冬天我一向好少買嘢。
睇親你敗家就開心~
回覆刪除因為我呢個香港文員仔好多時都係得個睇字~
但睇下都開心。
[版主回覆02/26/2013 23:19:35]多謝到訪留言.
貴有貴買, 平有平貴, 我依家最多都係買平價嘢, 港幣三幾百蚊咁上下. 喺美國著得靚都唔會有人識得睇....
Ceci
回覆刪除-我成日都好鐘意你買嗰d 衫褲鞋. 其實我都有上綱睇or 出街睇衫, 都留意唔到你嗰d. 你揀嗰d 真係好有款式. 好有style.
-好羨慕你可著波點窄身褲, 我完全著唔到, pat pat 太大啦! 好多人叫我唔好著.我個重災區係pat pat. 都唔知係咪坐得多. 哈
- 對Tory burch 我見到都丁一聲, 靚
[版主回覆03/08/2013 04:36:10]我其實嚟嚟去去都係買嗰啲牌子, 不過可能我太得閒, 日日都去睇有無新款, 因為有啲款好快就無貨.
你唔駛理人點睇啦, 有時我著啲衫都唔襯年紀架, 自己開心說得啦. 其實pat pat可以做運動練實啲, 不過見你平時無乜做運動, 到你真係對自己都好不滿時就自然有動力改架喇.