契爺契媽之前各自有一段婚姻，他倆結合時都各自有一個女兒，婚後再生了一個女兒，亦即是我契妹。由於種種原因，較年長的兩個女兒與他們沒甚聯絡，只有小女兒較親密。
說是小女兒，其實也不小了，28歲，大學畢業幾年，現在是初中老師。但因為一直是家裡的baby，所以少不免依賴一點，任性一點，硬頸一點。
她最令人擔心的一環，是感情事。
不知是否太被照顧保護，她絕不喜歡獨處，即使一個人留在家也不太願意，時常都要有人陪伴。
高中時與同學拍拖一直到上大學，但聽說那男孩對她不好。分手後即遇上另一舊同學，不消幾星期又投入新戀情，如膠似漆日日相見，更在大學畢業之前結婚。
老實說，我一直對這個契妹夫沒什好感，又胖又多廢話不是罪，但懶又沒上進心就與人無尤。多年來甘心在油站當個小職員，閒時上酒吧聽音樂扮Rock友。契妹日間實習夜晚上學，要照顧日常家務清潔剪草，他還多多事實埋怨她太少時候陪伴。到契妹找到全職教席，他又吹噓說是時候不再工作當個全職學生弄個大學學位。簡單地說，他五行欠打！
多年來，雖然我跟契爺契媽極不喜歡他，但因為都愛錫契妹，所以即使她投訴時，也只會理性分析或精神支持，因為我們都知道契妹極硬頸，自尊心又強，向她說太多壞話只會惹怒她。她有另一理由，就是覺得離婚是失敗，可能是太顧全面子吧。
去年底，我們終於守得雲開！
契妹夫被揭發在網上徵友，更將契妹名字登出說她壞話，其他之前如瀏覽三級網站、不回家等事已算雞毛蒜皮。契妹終於夢醒，翌日趁他上班時，收拾細軟搬回娘家，並即時到律師樓展開離婚程序。
大概大家都認為離婚是不幸之事，但我們卻高興都來不及。多年來日盼夜盼，都是這一日。
農曆年前，我約他們年三十晚吃團年飯。契媽帶來令人憂慮的消息：契妹在約會網站認識了一男子，有個11歲女兒，已見面幾次了。他還跟來吃團年飯呢！
我對他印象普通，但他目前正失業卻不是一個好開始。
更令我們失望又心痛的是，契妹又重蹈覆轍。
今個週末，我又再探望契爺契媽。一進門，契媽就說：契妹搬走了！
契妹自1月初已將之前的家放賣，因她不想再住在那裡，也不想前夫可以隨時打擾她。契爺契媽還剛開始裝修地爐，讓她有自己的天地。
但契爺契媽不是很開放的新一代，不論你年紀多大，他們是不會接受女兒男友留宿的。
就是為了與這個認識幾星期的新男友日對夜對，契妹前兩天突然宣佈：我要搬回之前的家，今日就走。
可以想像契爺契媽多心痛，又多擔憂！
契媽有勸告她，向她分析這安排不好。她硬說搬走與此男子無關，更對契媽嘮叨感厭惡。
我真的不知怎樣安慰兩老。契爺已差不多70歲，契媽也不年輕了，這個小女兒他們如珠如寶。最慘是他們也不是那種縱壞小朋友的父母，只是一般盡能力照顧支持，講道理以身作則的那類。而契妹除了此致命一點外，其他方面也很正常，學業工作盡責，心地善良，生活習慣正常。
身為父母，還可以做什麼？難道跟她決裂不相見？難道下次女兒受傷害不理會她？除了繼續擔憂，還可以做什麼？
契妹契妹，你還要父母擔心多少年？
um....唔知點講, 不過我覺得你契妹嘅性格唔多唔少受佢本身複雜家庭background影響左.....希望佢快d回頭是岸啦
回覆刪除[版主回覆02/23/2010 11:05:00]點解佢性格係咁，其實佢性格有啲似契媽，契媽又係唔可以無人陪，唔可以一個人屋企，同埋都顧面子....... 但契媽選擇咗好負責任又好鍾意二人世界嘅契爺，所以佢哋一直好恩愛，但契妹就唔識揀男朋友/伴侶，揀親個個都有問題......
我反而覺得佢家庭背景對契妹影響不大，因為契妹由細到大父母都健在陪住佢成長，佢成長得好順利架，反而兩個年長啲嘅half sisters就因為父母曾經離婚，成長得無咁順利。
其實諗咁多都無用, 條路係佢自己選擇, 別人左右不了...我們能做到的, 就只有等佢自己醒覺, 在佢失意時陪住佢...
回覆刪除[版主回覆02/23/2010 11:07:00]係呀，真係唯有等下次再接電話再去打救佢啦！
一個女仔唔識揀男朋友/伴侶，真係一輩子有排受。
都真係無咩可以做! 唯有希望妳契妹撞得板多會醒覺!
回覆刪除Feel sorry for your godparents...still need to worry the adult child even though they are at their 70s already.
回覆刪除[版主回覆02/28/2010 00:23:00]係呀，我都好戥佢哋擔心同失望！其實契妹個人本身唔差架，都好有愛心架，工作又勤力，但係呢方面就完全唔掂。
我第三細佬 , 成日擔心佢果兩個女 . 就係 懶又沒上進心 .
回覆刪除嘩蟹，好驚喎，好驚要擔心個女擔心到咁喎。
回覆刪除[版主回覆02/28/2010 00:29:00]我契爺好好人又好勤力負責任架！我成日覺得如果仔女喜歡父母，會搵個同父母差不多性格嘅人做伴侶，但係契妹搵親都係唔掂，令父母失望之餘，又攪到自己，唔通真係永遠都十八廿三咩。
有仔又要擔心，有女又要擔心，所以話長憂九十九。
見到呢個 case，即刻諗起養兒一百歲，長憂九十九 感情呢回事，從來都好難分對與錯，子女有自己認為對嘅選擇，父母有父母嘅擔心，能夠為子女做嘅就係提點佢地，同埋作為佢地嘅 back up，等佢地有乜嘢事都有條後路
回覆刪除[版主回覆03/02/2010 07:31:00]感情事難分對錯，都可以咁講，但係為咗自己嘅私慾而時常令父母擔心付出，我自己就覺得好唔啱。
我自己好贊成一人做事一人當，尤其係成年人，如果想揀某某做伴侶，好嘅唔好嘅都應該自己承受解決，唔應該有乜不如意就要年邁父母協助打救。我最唔鍾意契妹要向父母求救，但轉個頭又傷佢哋心，契媽好言相勸時仲發人脾氣，扮哂自己事自己攪得掂。成三十歲都咁任性.....
Ceci08
回覆刪除Ta姐，玩得開心啲，盡興呀！
男主人，喺日本行來行去嗰啲 女仔同AV嗰啲差好遠架 ，唔好傻啦！
ceci:
「也媽爹」唔係呀？男主人己經收集咗扎幌JR地铁站嘅路線圖喇、準備行來行去女大行動喇！
[版主回覆03/03/2010 03:39:00]男主人，你都唔係第一次去日本啦！點會唔知一般日本妹同AV嗰啲差好遠架！
玩得開心啲，照顧Ta姐呀！
感情既野局外人真係好難明既，你同你契爺契媽一定好擔心，但又唔可以比意見，話晒你契妹都係成年人，你地只可以比佢知你地會永遠support佢。
回覆刪除[版主回覆03/04/2010 08:52:00]佢年紀可能係成年人，但有時都仲好唔成熟，有時真係唔知道係唔係因為父母成日都support佢，打救佢，令佢繼續唔成熟。
或者愛情就係會令人盲目嘅﹐真係同年齡讀得書多少家庭教育都唔係好有關係。我都眼見好多父母嘔心溺血咁照顧﹐自己又唔係讀得書少﹐又唔係蠢嘅人﹐往往遇到佢覺得係Mr Right/Ms Right嘅時候﹐所做嘅野人哋眼裡覺得佢錯到不得了﹐但佢自己重覺得o岩。
回覆刪除或者呢個就係生兒育女嘅成套package﹐細時要擔心養唔大﹐大D又驚唔讀書無前途﹐畢咗業又驚佢揾唔到工﹐揾到工又驚佢無拖拍﹐有拖拍又驚佢識錯人比人呃﹐嫁/娶咗又驚佢養唔起/照顧唔嚟頭家﹐生咗又怕佢唔識湊......鬼叫我哋都係咁樣要父母為自己憂心......真係一代傳一代......人人有份﹗
[版主回覆03/09/2010 08:57:00]真係唔好講笑，我覺得我自己亞爸亞媽都仲擔心緊我哋(或者覺得我哋好唔掂)，或者你父母都一樣擔心緊你，除非父母老到唔太精神啦，如果唔係都仲係會擔心、擔心、再擔心。
我成日覺得揀錯郎無問題(我都揀錯過一兩次)，最緊要自己負責任，唔好麻煩人，唔好要人擔心打救...... 但係可能講就易，做就唔易啦！
喂，你幾時返嚟呀？
如果悠悠將來係咁, 我肯定好傷心, 所以做人父母真係好難, 諗起都驚!
回覆刪除[版主回覆03/17/2010 14:06:00]真係仔女無拖拍又擔心，有又擔心....... 點樣先可以令到仔女帶眼識人呢？
我覺得做父母唯一做到嘅，就係令小朋友從小有自信心，自我形象好，要令佢哋知道唔洗靠其他人認同/陪伴，一個人都可以好好，咁樣起碼佢哋唔會淨係為咗有個伴而隨便/夾硬同個人喺埋一齊。