各位哥哥姐姐，我前兩日生日呀，依家六歲喇！
上年生日媽咪請我食雪糕(詳情)，超好味，不過之後無食過喇！
今年媽咪話想買份好正嘅生日禮物俾我，咁好？有幾正先？
原來係狗仔競技器材一套！媽咪話我一日瞓到黑，又唔鍾意喺後園玩，話買呢套玩具希望我活躍啲曬多啲太陽！
有無攪錯呀！生日仲要我咁辛苦做運動？我諗住「食、食、食」咋喎！
上週末玩具剪綵，我正好惆悵之際，突然俾我聞到媽咪手上有好香好香嘅零食呀，羊肉味，平時未食過架！原來跟住媽咪跑同跳過啲玩具就有得食架喇！為咗食，我乜都肯，你睇我幾努力！
星期二我生日正日，天氣報告話會落大雨，但係媽咪放工時發現個地都乾得七七八八，專登趁天黑前車我去公園行咗個圈。
返到屋企繼續慶祝，我平時最鍾意有咇咇嘅毛毛玩具，咬開啲毛再咬爛個咇咇我就好開心好滿足架喇。媽咪之前見到有個玩具居然有8個咇咇，即刻買咗留翻我生日送俾我呀！佢仲話驚我一次過見到咁多個咇咇會興奮到心臟病喎！嘻嘻，太睇小我喇！
除咗玩具，無特別食物又點叫慶祝咗我生日呢！今次媽咪喺骨骨到搽咗好多花生醬，我第一次食花生醬呀，正到無朋友，不停lam，lam完都唔理條骨繼續lam張毛巾，嘩，簡直係天堂呀，會唔會好似毒品咁會上癮架？
有玩具有嘢食又去公園玩，生日就咁就過咗喇。日日都生日就好喇！
Blaze, 生日快樂啊!
回覆刪除[版主回覆03/17/2013 05:33:39]多謝你！都希望你家的毛小孩個個身體健康。
Blaze 生日快樂呀, 有咁多新玩具一定好開心呢
回覆刪除原來狗仔都可以食花生醬架
[版主回覆03/17/2013 05:36:04]係得架，花生醬係訓練狗仔好主要嘅餌之一，因為任何狗都勁鍾意架，有得食你叫佢做乜都得架。
當然唔好食咁多啦，間唔中少少都OK架。
須然遲左但都祝Blaza 生日快樂, 身體健康呀^^ 你媽咪份生日禮物好正啫
回覆刪除[版主回覆03/18/2013 01:21:29]多謝！
平時Blaze會追波架，我每日放工返到屋企，好多時佢都會去搵個波然後跟住我，等我知道佢想玩追波，不過佢追十次八次就會唔無氣！
依套玩具佢知道「玩=食」，佢聞到我開始準備小食同行出後園，佢就知道要跑同跳先有得食，暫時都OK，佢都好努力玩，我唔會俾佢玩好耐，十分鐘就停，唔想佢太攰或者玩厭。
did the peanut butter get stuck in her upper jaw?
回覆刪除[版主回覆03/18/2013 01:26:28]佢都唔知幾醒，平時佢食骨一定第一時間用兩隻手仔按住支骨，但一見上面係有搽嘢就唔掂條骨，驚整污濁隻手仔！淨係用條脷lam，我又驚條骨周圍碌，攪到我要幫佢hold住條骨！
Blaza, Happy Birthday, wish you always happy.
回覆刪除[版主回覆03/18/2013 10:04:14]多謝哂！如果我係佢我都一定日日開心！
Blaze, belated happy birthday!!
回覆刪除祝你日日都開開心心
JimJim都好鍾意花生醬架, 見到簡直癲左咁!!
[版主回覆03/21/2013 01:08:40]多謝哂!!!
我都諗住淨係生日先俾佢食啲, 平時唔會俾佢, 免得佢成日有期望.
生日快樂呀BLAZE！你同我一樣都咁鍾意花生醬
回覆刪除[版主回覆03/22/2013 02:31:44]多謝, 佢生日真係好快樂!
咁你同Blaze啱key啲, 我唔鍾意花生醬架, 痴住個咀入面個感覺好怪!!
生日快樂同最緊要身體健康
回覆刪除[nor c回覆03/26/2013 19:18:18]係呀
[版主回覆03/26/2013 10:53:08]多謝哂，佢生日真係好快樂，仲勁過媽咪生日呀！