國民任務：陪審員經歷(一)

在美國，擁有綠卡(永久居民身份)已可以合法居住、上學或工作，出入境沒有限制。唯獨有兩三樣公民權利/義務，是必須成為美國公民才可以擁有。

選舉投票權是其中之一(參選公職也是)，我去年花了近700大洋趕緊完成公民身份程序，就是為了可在年底的美國大選投票。

另一樣當公民的分別，是有義務當陪審員。很多綠卡持有人，因為不想當陪審員，又不重視投票權而不轉換公民身份的。當然，不想考試或不想付申請費也是原因。

我自己的想法是，做人有權利有義務啊，不應該只想盡辦法拿著數又不願作任何承擔，雖然好多人覺得這樣才叫叻，或許我的家教不是這樣吧。

更重要的是，陪審員制度是「普通法」的根基之一，時常都講「法治」好重要，不能空口講白話。要維繫法治的重要性，不只是靠少數當權者或執法專業支配，受法治保護的所有人都應該付出一點努力，我是很認同這理念的。

美國陪審員通常是在運輸部車牌資料庫或登記選民資料中，以隨機抽籤選出，我好些美國同事，18歲合資格後到現在幾十歲都未當過陪審員，想不到我當公民一年就抽中！我的最大擔心反而是要自己一個人早上繁忙時間駕駛到市中心的法院，所以在早一個週末已跟老公練習兩次並計算時間！

艱鉅的一星期

這幾天少探望大家了。

剛過去的星期二至星期五，我當了一件刑事案件的陪審員，在法院過了非常疲累、壓力非常大及心情沈重的四整天。

不知是否壓力影響，昨日完成後一向定時的經期都來早了。

心情仍然很沈重，相信都會影響一段日子，下星期有時間的話再分享吧。

藍宮夫人信箱(一) – 平凡原材料

Yahoo Blog首頁，會定期推介些人氣網誌，其中專欄blogger內時常有幾個網誌教人處理男女關係，如何找老外男朋友，盛女求偶技巧之類。我非常悶的時候會去看看，主要當笑話，因為那些內容如不是“鬼唔知我阿媽係女人”般的常識，就是將男女關係、異族關係看得像70年代的老土偏見，笑爆嘴。

我偶爾會在這裡寫一些情情塔塔舊事回味當年，令大家誤會以為我是個外貌出眾吸引力強的女子。哈哈，其實大家太抬舉了，這實在是一個大誤會。有見過我真人的blog友一定知道我距離靚女很遠，外貌完全沒有殺傷力。所以如果將來有機會相見，千萬不要存有任何期望。

雖然我在此從不出鏡，但也可以談談外貌特徵：長鬈髮、面圓圓、皮膚質素欠佳又偏黃、單眼皮細眼、鼻細細圓圓、正常嘴型，總的來看「最多」可說樣貌普通。至於身型，更無吸引力可言，成年後都是瘦骨如柴，A cup胸，5呎4吋徘徊80幾磅左右(近幾年結了婚才因藥物副作用升至100磅)，是大部份男士渴求女性有波有蘿有肉揸手的相反。以原材料來看整體外貌外型，是相當平平無奇的。

如果只針對外在不談性格，原材料欠佳，那為什麼我有時會有艷遇或被陌生男子搭訕呢？(我到現在上班的辦公大樓大堂或飯堂出入仍偶爾被其他公司的男人搭訕的。)

少買了

這一兩個月，不知道什麼原因，血拼少了。其實常到的網站我仍會每天留意，但可能今夏的款式不太吸引我，看不上就買少了。

前陣子在Florida旅行時買了這幾件，不約而同都是黑漆漆比較少見，這些較深色低調的連身裙我是會上班穿的。

鮮艷顏色中除了黃色，我亦喜歡綠色，尤其是emerald green及kelly

green，在Anthropologies買這件民族露膊上衣主要原因就是顏色，兩邊有袋可以插手也挺可愛的。

同店另一件超級花花冷製西裝外套，我是參考美國blogger的介紹入貨的，實物也非常鮮艷，不過襯淨色裙或深色窄身牛仔褲應該不錯。圖片來自Extra Petite.com。

Modcloth最近好像不能找到什麼心水，亂買一輪來來回回送貨退貨後就只剩這幾件。

這件上衣的花花印得好靚，而且價錢合理。

買了兩條裙，第一條純粹因為被那印花吸引，其實我知道以現在年紀著下擺拱起的裙已不太合適，但因為塊布太靚(而且質地挺身)所以還是留下來，我正準備叫改衫師父將裙腳改做pencil skirt，如事成應該會變成我的一件心頭好。

我只有5呎4吋高所以一向不會買拖地maxi dress，但又被這條裙的顏色、花花與上身的設計吸引住，昨日來貨試穿了雖然有點過大(當然亦過長)，但改衫師父應該可以幫我變成細碼版maxi dress，算是我第一條啊！

還有一對鞋，粉紅lace非常少女，有兩款鞋帶我只會用幼身的那對因為鞋帶不會遮住花紋。

最後一件是陪老公買衫得到的的意外。每年父親節後Brooks Brothers都會開始夏季大減價，我老公的上班服多在那裡買，但女裝部卻不太吸引我。今年去看減價貨時，被我發現了這件乾濕褸，原價400美元減半而且還有Petite 0碼，真的抵到爛！雖然顏色好像深了些少，但很合身不用改，最特別是褸內加了一層可除下來的棉絨(fannel)，太偉大了，寒冬的雨天也不怕啊！整件褸的車工非常細緻，我沒有穿乾濕褸的習慣，是一定不會捨得用上千元美金買Burberry，現在200美元執到高質素平貨，有點中彩的感覺，連售貨員也讚我好眼光，選了全場最物超所值的一件！剛到其網站再看已變回原價，想介紹給你們可惜遲了！

Blaze：媽咪真係購物逛

又係我做主腳呀！媽咪連放四日假超正，除咗可以日日見到佢之外，仲連續三日帶我去唔同嘅公園散步，又有好多冰冰咬，如果媽咪日日都放假就好喇(媽咪都係咁諗)！

你唔好以為媽咪淨係鍾意買衫買鞋，因為我得寵，媽咪都好鍾意買哥基嘢架，以下呢啲係過去幾個月買落嘅。

呢隻杯係媽咪暫時最鍾意嘅哥基杯，因為啲哥基劃得夠靚夠得意，又乜嘢毛色都有齊。

呢幾隻哥基瓷磚杯墊係姐姐(媽咪大繼女)喺Etsy.com搵到聖誕節買嚟送俾媽咪架，連姐姐都知道我幾得寵，嘻嘻！

呢件t-shirt隻哥基好勁好chok呀，著住件飛機師的風衣！不過貨到咗媽咪先知件t-shirt其實係男裝，俾媽咪太大件，俾爸爸又太細件(而且爸爸一定唔肯著)，所以遲啲可能都係捐出去幫吓其他哥基。

媽咪，你不停買不停買，究竟有無我份架？

緊係有啦！

媽咪見我平時坐車身震震好驚驚，估我可能係太矮睇唔到外面風景唔知自己去邊度所以好緊張。上網搵咗一輪，終於買咗呢張最大碼booster seat俾我。

張凳凳墊高咗，個軟墊有兩邊(一邊厚毛一邊普通布冷暖都得)，有條帶帶可以扣住我唔會周圍跳或者跌倒，凳兩邊亦有個位扣住車車安全帶，等我示範坐低睇吓得唔得先！最大碼都係僅僅夠坐，不過個凳邊啱啱抬住個頭頭都算舒服。

跟住就要放喺車車度試吓夠唔夠高喇！張凳底有仿麂皮包住，就算車開緊都好穩陣唔會郁嚟郁去架。

關門最後測試，啱啱好！瞓低唔駛企起身都望到外面呀！啱哂我咁懶同超細膽嘅狗狗，以後有得望風景，去邊都唔驚喇，多謝媽咪！

最後送張沖完涼毛滑滑肉照一張，姐姐幫我綁咗隻花花好嬌俏呀！

Blaze：國慶快樂

各位哥哥姐姐，好耐無見，別來無恙，大家有無掛住我呀？

我好好呀，日日都係食同瞓咁啦。都係爸爸媽咪超級懶，唔同我影相，所以大家少啲見到我囉，不過我又唔係好鍾意上鏡，都唔怪得哂佢哋。

前排媽咪話買咗對特製Blaze波鞋，我仲以為要我著鞋，原來係媽咪嘅鞋加咗我個名，嘩，當堂覺得自己變做明星有自己品牌呀！

媽咪話對鞋嘅紅色比電腦畫面更鮮艷，實物粉紅色嗰度無咁覺眼，應該喺個鞋邊或者鞋背再加多啲粉紅色喎(我狗哋唔明佢講緊乜)，另一遺憾係我個名牌嘅顏色同鞋花花嘅色太似，所以唔夠明顯喎。

我就安慰媽咪：都好靚吖，點都係獨一無二Blaze波鞋嘛，等我笑笑口同佢排排坐影張相先啦！

今日國慶，爸爸媽咪放假帶我去遊車河仲去咗另一個公園散步，我仲食咗幾條薯條添呀！不過每年今晚都有好多人放煙花boom boom聲，今晚有排驚驚！