Blaze媽：我家狗狗係「望父石」

(明早上機了，出埋這篇吧！)

最近兩星期，我發現Blaze有一樣好神奇又窩心嘅舉動。

我老公每星期一至四都不在家而飛到其他州工作，最近星期四夜晚都係大約十一點半至返到屋企。

先講一吓Blaze平時夜晚會做乜：基本上乜都唔做。我食完晚飯後，就會坐在客廳梳化一邊上網，一邊看電視，而Blaze一係坐喺我腳邊，一係就返佢間屋仔度瞓覺，就咁一路灘唞到十點半等我帶佢出去小便，然後就再等我十一點多入睡房佢就跟住，然後走去自己床仔瞓覺。

呢個程序基本上每晚一樣。

但最近兩個禮拜嘅星期四，一到十點左右，Blaze就會走去門口附近坐底，然後望實門口好似等人咁。我最初以為佢聽到門外有聲音，又或者係鄰居返屋企佢八卦之類，但係佢就一路唔郁，就算我叫佢，問佢做乜事，佢擰轉頭望住我一陣，又會繼續望門口。

原來，佢係等爸爸返屋企。

上星期佢第一次咁做時，我雖然都覺得好奇怪，但係之前幾個禮拜我都喺老公返屋企前吸塵同埋吸張梳化，佢可能知道媽咪咁做之後過一陣爸爸就會返屋企，所以上星期我吸完塵之後佢坐喺門口等我都仲覺得正常啲。

但係今個星期四我連塵都無吸，就咁一路坐喺梳化，同星期一至星期三一樣，點知一到十點鬆啲，Blaze就走出自己屋仔，然後… …

係咪好神奇呢？坐咗一陣，我問佢：「你係咪等Daddy呀？你知道Daddy一陣返？」佢擰轉頭望住我，之後就又繼續望翻門口。

我之後叫佢去小便，佢有跟住我去，去完又食完維他命丸之後，又繼續坐翻喺門口等，我就用手機影低張相，俾佢爸爸睇吓佢隻狗狗幾乖女。佢真係只係為咗等爸爸，爸爸一入門放低行李，同佢打招呼摸吓佢之後，佢又會正常翻走翻入屋仔又或者跟翻我。

其實有養狗嘅人都知道狗有時間觀念，知道每日時間點過，而亦都有好多狗狗會喺主人每日離開之後喺門口等，有啲仲會等成日。狗狗亦可以從主人起床之後嘅行為，知道係唔係週末。

但係識得分辨「日子」，好似Blaze咁知道「某一日」爸爸會返屋企而坐定定喺門口等嘅狗狗，我相信少之又少，我覺得好神奇呀。

最後送上Blaze肉照一張，佢日頭最鍾意嘅做嘅事：曬太陽！