雜談 – 加自我介紹

今日呢篇用廣東話寫傳神啲。

返工無聊時睇翻以前嘅blog，2008年到依家原來已經有6年多，唔覺唔覺原來都咁長年間。

頭三兩年認識嘅blog友，大部份都因為生活忙碌/熱情已過而唔再寫，當中有啲啱嘴型嘅變咗真朋友，偶爾會見到面，亦有啲突然間消失咗。

今日睇吓我個blog嘅來客資料，頭三地區係香港、美國、加拿大，好正常；但之後發現原來我都有啲隱形讀者，因為有來看台灣、澳門、澳洲、英國、馬來西亞、韓國同埋德國嘅來客，其中台灣、澳洲、馬來西亞仲有韓國令我覺得好神奇。(噢，可能我平時唔用廣東話，令國語人都可以看懂一點吧，今次呢一篇抱歉)。

今日自大狂賣大包，向各位blog友及隱型讀者介紹吓自己。

下年一月就43歲嘅中年女人，來自香港，廿幾年前高中時喺美國做過一年交換生，之後每隔幾年都會返嚟美國探寄住家庭，有時一住幾個月。2006年嗰次認識咗現在嘅老公，遙距交往一年多之後，2007年年尾再結婚移民美國鄉下地方。

再結婚因為曾是失婚人士，21歲至26歲曾有一段連家人朋友都不知道嘅婚姻，純粹因為當年仲讀緊大學，唔想向其他人交待解釋。反而離婚後有同家人朋友講，因為已成過去易講好多，亦無人敢多問！

高中時去廟街行街，貪得意睇相，當時最想知道仲有無機會出國讀書，點知個相士用好長時間同我講我有桃花命(劫)，叫我一定唔好早婚。哈哈，我當時讀女校都未正式拍過拖，外貌亦一啲都唔吸引，而且我本身唔迷信，所以當然無理會佢。但可能我屬遲熟派，入大學之後就無停過談拍拖/結婚/離婚/再拍拖/再結婚，廿幾年來完全單身嘅時間非常少。可能我係一個大膽無乜傳統顧忌嘅人，所以接受/拒絕戀情都唔難，而且我發覺，同不同人戀愛後，會認識自己同對自己嘅要求/底線有好大幫助，對之後嘅關係有益無害。

不過我可以咁做，可能因為我可以從情傷中自我痊癒。我用嘅方法有啲人會覺得極端，因為我通常會離開香港到第二個地方流浪或者住一排，幾個月又好，一年又好。將自己放喺另一個世界生活，就更容易分心，不再沉淪喺自己嘅悲哀之中，這個方法我暫時用過兩次，比食抗抑鬱藥物有效好多。

當然，可以咁做，平時生活上要減少自己嘅負擔，所以喺香港時，我都只係租屋住，喜歡小動物亦無養過，亦唔會同男朋友同居。我無乜擔心過再搵工搵家嘅問題，一來我覺得當務之急係心靈情緒治療，太著重身外物就本末倒置，二來我好運，回港後通常三兩個月就會找到工作，住嘅地方甚至生活費，都有啲多年嘅良師益友臨時幫忙，不用幾個月就可以回復原狀(除咗無哂啲儲蓄外)。

我係一個非常容易將生命/生活上嘅選擇，集中喺一啲「核心價值」上嘅人，所以成日會做出啲其他人覺得極端嘅行為。大家都知道我係購物狂，但對我嚟講，身外物同金錢我係可以隨時捨棄嘅。

常人認為更重要嘅，例如自己嘅生命，我其實都覺得唔係太重要。我一個非常尊敬嘅大學教授，患癌多年，死前有同學(依家好紅嘅周保松)訪問佢對死亡嘅睇法，佢話喺大學校園見到一花一草，感受到宇宙萬物都有來有去，之前一季嘅花草不凋謝，今年就唔會見到新開嘅，人嘅生命亦一樣，無死亡，就唔可以承傳新生命嘅誕生同存在，所以人一定要接受死亡。我好認同，亦覺得現代人對於「個人」實在放得太大。命長而過得混沌，一啲意義都無。可能我哋呢啲讀哲學嘅人，諗嘢都奇怪啲，不過我讀大學前已經係咁樣。

另外俾啲八卦資料俾大家

同我性格有啲相反，我滴酒不沾，唔單只係唔鍾意個味道，更嚴重嘅係我對酒精有感敏，唔係出疹易醉咁簡單，而係飲一兩啖，完全未去到醉嘅階段，已經會昏迷不省人事。其實係非常危險嘅，因為唔知自己暈咗嘅話都幾麻煩。我試過飲兩小啖被誤放酒嘅virgin pina colarda，即刻離場飛的返屋企，趕及入到屋先暈，醒來已經係兩小時之後。因為咁樣，我試過自己喺屋企試飲紅酒希望練一點點酒量，但係唔成功。其實就算食醉雞，如果濃的話我都會好暈，係咪好弱雞呢！

我雖然好大膽，唔怕黑唔怕鬼唔怕蛇蟲鼠蟻，但係怕落樓梯，如果多過幾級，就一定要隻手扶住欄杆/牆邊至行到。

我試過有焦慮症，但只有身體上嘅病徵(靜止心跳非常高、易喘氣、容易發惡夢)，食咗幾年藥之後無事。

我大部份伴侶，都係網上認識嘅，包括依家老公。同大家直覺可能有出入，我拍過拖/約會過最差嘅男人，反而唔係網上識嘅。網絡只係一個渠道，會帶眼識人嘅，乜渠道都一樣。

我對性行為的態度，基本上同一個男人嘅睇法一樣，因為我不需要「先有愛才有性」，一夜情可以，有性行為嘅純友誼亦可以，有愛無愛我都唔抗拒亦一樣享受(雖然感覺係會唔一樣)。我成日覺得，現代人俾太多宗教同無客觀理據嘅倫理捆綁住，將「性」忌諱化、邊緣化、童話化。講咁多男女平等，如果連自己身體都主宰唔到，其他真係免談。點解成日要話女仔蝕底呢？大部份性行為男生付出嘅體力更多，定因為大部份女性都唔懂得享受性？

工作又好，生活又好，我行事非常快，所以一日24小時對於我嚟講係好多，空閒嘅時間多，自己又八卦，所以會睇埋好多無聊資訊。腦轉得快，先天當然有影響(我假假地都係門薩會會員)，但我絕對相信後天訓練都有幫助，任何人都可以訓練增加自己效率嘅方法。

先自吹自擂到此，都歡迎blog友八卦提問，或隱形blog友歡迎打招呼！