和平佔中 (三) - 更新

以下就是過去一星期我在FB的幾次更新。

香港時間9月28日2:49 pm – 當時警察仍未放催淚彈，但開始在金鐘周圍封路阻止支援的市民

「今日佔金鐘，聽日佔中環，後日尖沙咀。佔中係長期抗爭，如果今日被拉、被水砲驅趕、被警察封路不能支援參與嘅，唔好氣餒，今晚再嚟過，聽日再嚟過，最好警察封咗香港十八區，咁佔中目的就成功！要有後繼力，可以休息時休息，不要太緊張，要為長期抗爭準備。

香港時間9月29日4:19 am – 警察使用催淚彈後，同時佔中環/佔銅鑼灣展開

「大家不要因為警察鎮壓的武力程度驚訝或意外，更強力嘅鎮壓陸續有來。佔中嘅要求比任何一次民主抗爭更澈底，並唔係一條法例(公安法)、一個政策(國民教育)、又或者一兩個特首上台落台咁簡單咁小事咁容易妥協，講真狼振英落台好小事。如果中央對佔中有任何讓步，就係直接喪失香港管治權，所以即使更武力更血腥，中央都一定唔會妥協。(當然我希望我估錯)

要有心理準備「遍地開花」癱瘓全城後，警方因人力不足會要求解放軍協助嘅可能性會高，鎮壓力度亦會愈來愈大，但我唔係叫大家因為怕失敗而唔好上街，相反，我只希望大家更做好心理準備。

有組織嘅公民抗命又好，零零星星嘅公民不合作又好，希望大家一定要持久戰，要返工返學嘅可以得閒夜晚出嚟阻吓街，又或者有意識地開展「不合作」生活，即使耗盡我哋餘生，都要繼續落去，只有咁做，至會有朝一日，有朝一代革命成功，大家千祈唔好氣餒或者咁快放棄。」

香港時間9月29日9:09 pm – 國慶前一晚，更多市民學生佔各區，我見到一些FB留言段有感而發。

「唔好因為集會嘅主要係學生年輕人，又或者佢哋有說有笑，嘻嘻哈哈好似O Camp咁，就質疑佢哋唔知做緊乜。漫漫長夜日復一日嘅持久戰，我都唔知幾希望佢哋會用輕鬆心情面對。到將來有朝一日見成效時，大家記得多謝呢班你矮化睇唔起嘅細路。」

香港時間10月3日11:50 pm – 旺角佔中被有組織暴徒襲擊

「話佢哋係黑社會好似侮辱咗黑社會，香港傳統黑社會好少騷擾普通香港人，亦未必會為三幾百蚊打人。我睇啲相，佢哋衣著年紀都唔似黑社會呀。」

(有做突發新聞的朋友回應：…查實黑社會組織架構都幾嚴密，真係唔係咁易入到真正嘅黑社會，呢班人或者我們可以稱他們為流氓，比黑社會會員更低層次，最慘係佢哋以為自己係黑社會，可惜其實連黑社會都不如，所以會為幾舊水都唔出奇。)

香港時間10月4日9:18 am – 旺角暴徒襲擊市民學生後的星期六早上

「雖然時間係緊迫啲，但我覺得係時候嚟個向全球傳媒公佈嘅show hand，佔中/學聯可以考慮聽日下午嚟個全民大靜坐(遊行太攰，老人家小朋友辛苦，又易俾政府亂估人數)。港島區由金鐘向兩邊坐開去，九龍區由旺角彌敦道兩邊坐開去。

即使無六四時嘅一百萬，就算只有三五十萬，對連日堅持佔領嘅學生/市民同埋好多出錢出力嘅市民都係一個鼓勵(佢哋已經好攰，好需要一啲精神支持強心針)，個運動要持續就要有momentum。」