19/8/2016

我心目中的男神

抱歉用了廣東話,這一篇其實想寫好多年,但總係未能的起心肝動手。

大家心目中的男神係邊類型?又有無隨著時日改變?我所指嘅係公眾人物,例如演員歌手等。

我發覺我由細到大,覺得靚仔,覺得有型或有魅力嘅男人,都係一個類型,睇嚟我都幾忠心。

先旨聲明,我年輕時係八九十年代,我以下寫嘅幾個男神,可能對於一啲讀者嚟講係阿伯級人物!

初中時我已經崇洋,對香港嘅明星歌星無乜特別感覺(我從來都唔覺劉德華郭富城吸引),但係一套荷里活電影「殺戮戰場」(Platoon),令我迷上當年21歲的Charlie Sheen。套戲好睇佢演技又唔差當然係有加分,但當年14歲的我,真係覺得Charlie Sheen巧靚仔。呢套戲我當年入戲院大大話話睇咗6-7次,好在當年有個同學同我一齊鍾意佢肯陪我癲。嗰時仲會用僅有嘅零用錢買有佢出現嘅雜誌!


之後一年佢又有第二套電影出,叫No Man’s Land,係講臥底警探潛入保時捷跑車偷車集團嘅故事,我估無乜人睇過。但我細個嘅dream car係保時捷911,而且又有佢做主角,當然會去捧場!


之後到大學時,雖然我無乜特別留意呢個人嘅作品,但有一段短時間我覺得年輕時嘅金城武好型又靚仔。其實90年代日劇好紅時,都有好多女仔迷上竹野內豐、木村拓哉,但我淨係覺得金城武得,可能佢個樣同佢形象都有神秘感,我覺得特別型。



但我咁大個女,令我真係會去買張巨型海報貼喺房嘅,至今只有一個人,就係Keanu Reeves94年電影Speed上映,我剛好喺美國探我host family就一齊入場睇。我之前都睇過佢好多電影,例如Dangerous LiaisonsPoint BreakMy Own Private IdahoLittle Buddha等等,但除咗覺得佢青靚白淨同埋演技麻麻之外,就無乜印象。但係睇完Speed,雖然佢演技都係無乜進步,但我就突然覺得佢超靚仔有型,返香港之前仲去買咗張超超巨型海報(下圖),大學四年級自己租房住時,就貼咗出嚟。(當年我已結婚,唔知我前夫有無覺得奇怪!)


99The Matrix上映後,我更加覺得真係無其他人可以做Neo(即使佢演技仍然好屎)。雖然有時私下有啲不修邊幅,但Keanu Reeves亦係暫時唯一一個,我覺得即使人到中年之後,仍然覺又型又靚嘅男神。

最後一個就係Clive Owen。呢個可能唔係太多亞洲人認識嘅英國演員,佢早期嘅作品我都唔係睇過好多,只有佢做閒角嘅Gosford Park同埋The Bourne Identity,對佢無乜印象。但係2004年一套Closer,令我深深覺得佢型爆燈!當然佢個角色係四個主角之中最討好最吸引係有好大幫助,但係我真係覺得由佢演先至演繹到咁型又有幽默感。你可以話佢唔靚仔,但佢個樣好有男人味。可能後生女唔明白,但對於我呢個中年婦就超搭糖。我覺得佢其實好適合做James Bond,但佢揀戲有佢獨特風格,我估佢都唔想做James Bond


以上就係我近廿年嚟,覺得有吸引力嘅男神喇。我發現其實佢哋都有啲共同點,無論乜國籍,都係深髮深眼色,我依家個老公都係。唔知點解我對金髮男眼一直都無乜興趣,雖然Brad Pitt或者未甩頭髮前嘅Jude Law都有好多人話靚仔,但同我就唔通電。

另外,我鍾意五官靚得嚟,要有啲男人味,我覺得依家好流行臉小小尖尖瘦瘦嘅 款太女性化,我都係鍾意男人jaw line明顯啲。所以細臉大眼如Johnny Depp呢啲樣我又係無乜感覺。

如果你問我,我哈韓都哈咗兩年,有無乜心水男星男偶?我諗咗一輪,都無乜特別邊個令我心動。當然韓國娛樂圈有好多好多靚仔、小鮮肉,我多數只會覺得佢哋好可愛或者皮膚白淨五官分明,但係大部份對於我嚟講都唔夠男人味。呢個都唔關年紀問題,可能我自己比較喜歡面部有啲粗獷味,而韓星多數走精緻派。

如果真係要揀一個,我會揀金在中,不過唔係因為同我有異性相吸,而係我係以一個純欣賞角度去欣賞佢輪廓。因為佢個樣真係同日本漫畫啲主角好似,皮膚白無瑕疵,大眼鼻又直又尖,嘴細但唇厚,唔理乜國籍,唔好話男人,佢比好多女人更靚更精緻。我見親佢啲相就會覺得好神奇,懷疑佢係咪真係漫畫跳出嚟。不過佢以前俾人一個較女性化妖艷或性感嘅形象,可能因為佢以前表演時,為咗配合走搖滾風會化好濃妝。




佢依家入伍做緊軍人,捱咗年半仲有半年就走得。佢有參加軍中嘅樂隊,有時會為唔同場合做公務表演。前幾日係韓國紀念二次大戰戰勝日本嘅光復節,佢有份出席一個戶外演出。韓國軍人係無論任何時候都一定唔可以化妝嘅,所以有時會見到啲入咗伍嘅藝人個樣唔同哂。但你睇吓佢無化妝個樣?一樣成個公仔咁眉清目秀唇紅齒白。最神奇係做咗軍佬成兩年皮膚都係咁白,因為佢軍樂隊嘅參與只係一個附加任務,平日佢一樣要做其他軍人做嘅所有職務架(例如操練/守營/去戶外做清理工作等)


入伍之後,佢同其他當紅藝人一樣,因為進食休息正常翻,已經重咗二三十磅,不過佢係非常自律嘅運動狂,唔會好似其他藝人咁由得自己變肥等退役至減,佢將啲磅數變哂肌肉,著埋軍服真係男人味十足,有無見過咁型嘅軍佬?



入伍之後,因為佢本身性格隨和又友善,多咗好多男飯,我有見過佢喺軍隊內部表演嘅錄像,有軍佬做哂有佢名嘅花牌為佢叫囂應援,好攪笑架!依家軍隊內都有流行笑話,就係如果睇唔到女團演出,有得睇金在中都好!不過以佢輪廓,我估佢都無可能達到我喜歡嘅粗獷性標準,但係加埋身材性格等等,佢都好接近成為我心目中嘅男神喇。







10 則留言:

  1. 金城武真係幾型!男人始終都係越成熟越有味道!

    而我心目中最靚仔嘅香港藝人一定係張國榮!

    回覆刪除
    回覆
    1. 金城武依家就唔係好得喇,保養唔夠好,我覺得比佢真實年紀老。

      唔知點解,我真係對香港嘅無乜感覺,張國榮我都係麻麻地。

      刪除
  2. 最近先才重看 Hot Shots! 1 & 2, 胡鬧得來幾好笑, 可惜佢嘅 Anger Management 令我失望

    回覆刪除
    回覆
    1. 講靚仔唔駛包性格嘅,又唔係做朋友做人世,我純粹係objectify班男人咁睇!。

      刪除
  3. 我無迷偶像,總之那期邊個紅,有人氣,我都鍾意囉。不過Richard Gere and George Clooney 係我all time favorite

    回覆刪除
    回覆
    1. 我都唔迷架,真係除咗覺得佢哋靚仔就無其他行動喇。

      George Clooney男人味都夠,Richard Gere我就無感覺喇。

      刪除
  4. Eye candies...

    I like athletes. Love their tenacity and mental toughness. It doesn't hurt that they also have hot bodies to boot. However, they are usually too arrogant for real-life mates.

    回覆刪除
    回覆
    1. 運動員,我又真係無諗過喎。可能藝人歌手多啲機會出鏡啦。

      男神從來都唔係用來mate架啦!

      刪除
  5. 回覆
    1. 吓?好多咩?我覺得少喇!

      刪除