週五提早兩小時下班直接到機場，旅程非常順利。外來遊客在紐約乘的士要留意，因為很大機會司機會說塞車，提議帶你走另一條路！在紐約已工作了差不多一年的老公之前已教曉我三條不同到酒店的路，並叫我要向司機說，讓司機知道我不是路盲。
我的司機當然仍對我說很塞車(長週末前入城當然不塞車，出城才會塞)，但我跟他說我老公要我行這條路，我就要堅持。他當然不高興，一路走一路依依哦哦，但二十分鐘車程除了紅綠燈位外，全無塞車，車資比老公估計的還要低。(這是在大城市的通病，大家要鬥強！)
第一晚的節目一早準備好，就是跟blog友阿四及她老公白頭佬吃晚飯。點菜時有一點難度，因為我老公嚴重偏食，任何餐廳餐牌大部份的餸菜他都不吃，所以我跟他們說，不要理會他的喜好，我會點一款他會吃的就可以了。最後當然我們其他三個吃得很滿足！哈哈！
老公絕不會吃的避風塘炒蟹
飯後到了歷史悠久的甜品店Veniero’s吃甜品，我已經很飽又不太好甜吃了生果撻，老公吃了芝士餅。跟阿四兩公婆吹吹水很快已到差不多11點，大肚阿四已出城一天一定已很累，我亦工作了一天頻頻撲撲也累透了，回酒店即沖涼睡覺！
酒店房的觀景不錯，直望Hudson River。
多謝阿四和白頭佬請食飯，下次會見到他們的小公主了！
好開心啊……… The view 又好令喎！下次我去NYC坐的士，都要學習下同司機堅持到底先！
回覆刪除[版主回覆07/10/2011 09:16:00]你呀，如果你之前做好功課，會無咁易俾人呃。紐約當然會有好塞車嘅時候，但係睇你趕唔趕時間啦，有時塞車都平過兜路好多架。
咪咁客氣啦 你老公望住我地食蟹嗰個樣，好似睇緊 Discovery Channel 啲土人食蟲咁，勁攪笑呀 期得下次再見，再去食餐勁嘅
回覆刪除[版主回覆07/12/2011 10:15:00]佢話唔明點解你哋兩個用刀叉食咁斯文，我用手咁野蠻喎！ 我話平時香港人食蟹都係用手架，我都唔知點解佢哋會唔用手！
嘩~~你真開心理! 香港玩完又玩NY, 好鬼羨慕.... D 避風塘炒蟹又炒得好有水準喎!! 同香港有得揮!!
回覆刪除[版主回覆07/12/2011 10:07:00]係呀，連續咁玩好攰好攰呀！我條腰喺香港整親到依家都未好，仲好痛。 啲蟹味道都好好架，咁啱我今次返香港無食橋底辣蟹，啱啱好！
我平時上的士實係由得的士佬決定路線...好在你老公教路咋, 唔係實比個的士佬點你喇...
回覆刪除[版主回覆07/12/2011 10:03:00]我相反，我都通常都想行自己想行嘅路，不過香港都算細，行邊條路都唔會差好遠。紐約啲的士司機成日呃遊客架，車錢可以差三幾百蚊港紙架。