Blaze ：見到仔仔

各位哥哥姐姐，好耐無見，大家好。

我第一次嚟新blog，媽咪話要有禮貌同大家打招呼。

琴日我去好遠旅行呀！係一年一度NC Corgi Picnic(北卡哥基郊遊)。喺美國，好多個州都會有年度哥基聚會，北卡都有，舊年媽咪知道時已經過咗我去唔到，今年就一早準備一定要去，到時仲會見到我舊媽咪架(Blaze的繁殖家)。

點知嗰日撞正媽咪godson一歲生日開party呀！咁我哋唯有先去生日派對再去哥基郊遊啦！不過因為咁樣我哋去到已經係尾聲，好多遊戲環節(鬥快食熱狗、短跑比賽、最佳哥基pat pat選舉等)都已經玩完喇，有啲狗狗亦已經走咗，無機會見到超過150隻哥基喇！真係可惜！

不過我哋一入門口，就見到舊媽咪，我當然認得啦，佢餵咗我食飯飯四年架嘛！原來喺門口仲有……我仔仔！

新讀者可能唔知道，其實我做過一次媽媽，生咗3隻小哥基，但係有一隻出世幾日後走咗，剩低一個仔仔一個囡囡，佢哋兩個月大就各自跟自己爸爸媽媽走咗喇！

舊媽咪繁殖過我一次就無再試喇，因為一來我胎數唔多(有啲媽媽一胎八九隻架)，二來我囡囡係長毛哥基(fluffy corgi)，即係比一般哥基啲毛長好多，有啲似松鼠狗咁，fluffy哥基雖然好靚亦都會係好好嘅家居寵物，但係就唔可以用嚟外型競賽(Conformation)，雖然我毛色體型超標準，但可能我有隱藏fluffy基因。我舊媽咪係競賽繁殖家，唔係為賣寵物而繁殖，所以試過一次就無再繁殖我喇。

囡囡我未見過，不過兩年前我都見過仔仔一次，上次媽咪唔記得同我哋影相，今次記得喇！

我同仔仔Brodie合照！

佢大隻過我好多架，又長又大件，雖然得唔到我對靚眼，不過同我一樣咁乖咁友善，見到仔仔大大隻又健康，我都好開心。

因為好多狗狗都走咗，爸爸都無乜影相喇，以下係其中一啲。

有甩繩場地俾我哋跑同追波波

又有水塘仔俾大膽狗狗玩跳水

以下幾隻就係fluffy喇，係咪好靚呢！

我係主角，當然仲有我近照啦！

下年一定要早啲到！