Blaze ：萬聖節快樂

過兩日就萬聖節，又會有小朋友嚟敲門攞糖糖。

因為依家早天黑又開始凍，呢邊啲小朋友都好早就出發，有啲五六點就出發，基本上八點鬆啲就派完。

我完全無看門口本領，有人按門鐘唔會吠，通常八八卦卦跟住媽咪去開門睇吓邊個嚟，諗住有多啲朋友仔嚟可以摸我肚肚同我玩。但係幾年都係不停按門跟住三幾十秒就走人，又唔同我玩，我跟得三兩次就無癮唔會再跟去開門喇，媽咪話都未見過咁懶嘅狗仔。

因為我哋留喺屋企派糖糖，所以媽咪都無再好似兩年前咁為我扮鬼扮馬喇，安樂哂！新讀者們，兩年前媽咪就變咗我做山羊，你睇吓我幾無奈！

唔知點解今年附近啲屋企好似少咗裝飾，就算有都係細細件，無前幾年咁多花款。我哋屋企往年都只係喺門口掛個南瓜牌等啲小朋友知道可以嚟攞糖，今年媽咪加咗我個閃閃Q嘜出去，巧靚呀！

其實呢隻燈燈哥基仔，原本只有普通白色燈，應該係聖誕布置用嘅，媽咪走去買咗串橙色會閃嘅燈再圍多一圈，咁就萬聖節都用得喇！

你睇吓，同我一樣大架，真係一比一。

爸爸擔心有人會偷，所以唔敢擺咁出，而且都係屋企有人至會著燈，希望無人偷啦。

媽咪買隻燈燈哥基時，同時買埋隻草草哥基，係咪好得意呢！

呢隻嘢仲大件過我少少，我第一次見到時驚驚速逃呀！之後大膽啲再行埋去，發現……咦？有草草味道，我鍾意食草草呀，梗係走埋去嚼嚼佢先，媽咪見到即刻叫停！

媽咪依家諗，死火喇，放喺有圍欄後園又驚俾我食咗佢，放前園又驚俾人偷，唔知點算，所以就咁放喺後園張檯仔度，我每日出後園都會望吓佢先架。

各位哥哥姐姐，萬聖節快樂呀！