Blaze: 2016 Corgi Picnic

大家係咪好耐無見過我Blaze呢？

都係因為媽咪勁懶囉！不過我啲日常都係差唔多，又都唔太鍾意影相，繼續過緊好hea嘅日子。

我都係咁啦，食好瞓好，健康都好。不過最近媽咪晚晚喺房不停勁播同一隻歌，又唔係英文又唔係廣東話，我都唔知唱緊乜，但就每晚重複播一百幾十次，我聽到怕怕喇！遲啲可能發夢都聽到呀！(媽咪注：Blaze，過埋呢兩日就完喇，多謝忍耐！)

上兩星期，媽咪爸爸突然車我去好遠地方，話去我哋州每年都會辦嘅corgi picnic。其實我3年前都有去過(見此)，不過如果你問我，我就麻麻地，一來我唔鍾意坐長途車會好緊張，二來我又唔太鍾意同其他狗狗玩，所以去corgi picnic似係滿足媽咪爸爸多過滿足我！但媽咪話即使唔想去，都要隔幾年去一次，因為要帶我去見舊媽媽(我原來的繁殖家)。

今次好早起身就出發喇，因為要趕及11點影團體相。FB網頁話有300隻哥基嚟，不過個picnic攪足成日，有啲狗狗早到早走，有啲遲到遲走，我哋都無數過，下面呢張係官方相，我估有百幾隻狗狗卦！官方照拍咗好耐，都唔知幾時拍到我，所以我無望鏡頭呀，失敗！

不過爸爸拍嘅就一定望鏡頭啦！你見唔見我呀？對住鏡頭笑得好開心嗰個就係我喇！我嗰日好乖乖，周圍都係狗狗我都不去吼佢哋呀！

厭我個頭太細睇唔清楚？咁我再笑得開心啲你睇！各位姐姐姨姨大家好！

影完相行咗個圈，媽咪買咗係哥基tee，我哋就自己擺好個陣，等我休息吓飲啖水，嗰日太陽好曬有啲熱，之後媽咪都要喺我地盤掛幾件衫幫我擋太陽，仲話我好命自己有得遮蔭，媽咪爸爸就乾曬！Well，媽咪，你身體無兩層毛毛嘛！

等咗一陣舊媽媽到咗，我仲認得架，佢仲讚我身型正keep得好添(最衰媽咪控制食量超嚴厲)。原來繁殖家退休時留低嘅三隻哥基(包括我爸爸)，過去幾年都全部患病走咗喇！我原本係因為跟其中一隻狗女唔妥，唔可以一齊住，所以舊媽媽至送走我，依家啲狗狗走哂，舊媽媽開玩笑叫我返佢屋企呀！我緊係唔去啦！依家屋企咁好做公主，我實癡實媽咪腳邊吋步不離，媽咪行開去個廁所我都要扯繩跟住呀！

我哋無留好耐，大約兩點鐘就起程返屋企喇。媽咪話車程實在太遠，我又唔係特別鍾意同其他狗狗玩，所以應該唔會再去corgi picnic喇，如果要見舊媽媽再分開約仲好。

最後送一張6隻哥基排排走嘅相，媽咪話有尾Cardigan Corgi之中，佢最鍾意就係咖啡色帶金色嘅Brindle(由左起第三隻)，啲金色陽光照射下好靚架，不過Cardigan Corgi運動量大，媽咪咁懶，都係得個睇字。