Blaze ：媽咪係我BFF

我同好多哥基一樣，淨係鍾意被人摸，唔太好被人攬攬錫錫，好多時被攬被抱都會逃走。

我Blaze就更加無乜錫錫嘴嘴人嘅習慣，就算媽咪哄個頭埋嚟，我有時都擰開面架。

不過凡事有例外，我只會喺一個情況底下錫人，就係“個人要矮過我”。你哋一定笑我，你腳咁短又咁矮，仲有邊個矮得過你呀？

有！就係個人瞓底嘅時候喇，咁我就一定高過佢喇。因為高啲嗰個，幾時走人都得，安全感大好多架。

喺我哋屋企，只有媽咪間唔中至會咁做，仲要係佢準備沖涼洗頭前一陣至會，因為瞓完地一定全身全頭狗毛。我係媽咪跟尾狗，媽咪一瞓底，我就會好興奮咁哄埋去佢塊面度錫錫錫，又或者拍埋自己個身去媽咪旁邊有咁近癡咁近，我通常呢個時候就係最嗲架喇。

你睇我，我當媽咪個頭係枕頭，我哋好friend架。

我有時又會爬上媽咪身上。

爸爸係唔會咁做嘅，一來佢有潔癖唔鍾意被狗狗錫，二來佢雖然日日會同我玩拋波波，但麻甩佬一個，無媽咪咁會鍾意攬我錫我同我講嘢。所以瞓地攬攬錫錫就係我同媽咪獨有嘅bonding time。

雖然爸爸媽咪都好錫我，但兩者之間我一定信任媽咪多啲，每個有狗狗家中嘅pack alpha位置，我屋企就一定係媽咪莫屬。亦因為咁，媽咪就算亂咁攪我搬我抬我，或者有啲情況整到我唔舒服，我都唔會反抗，因為我信得過媽咪係唔會傷害我嘅，你睇佢將我打橫放喺佢身上，我都瞓定定唔會走狗架。不過媽咪都話做alpha蝕底，因為我所有沖涼、洗耳仔、刷牙、剪腳甲等麻煩嘢都只係媽咪一個人負責。

點都好啦，媽咪就係我BFF。

(媽咪註：哥基呢隻狗種，一來有畜牧性格，二來因為身型矮又跳唔高，容易缺乏安全感，會唔太喜歡被攬被抱，年輕嘅哥基更甚。但為咗照顧佢哋，有時有必要抱佢哋或者箍佢哋，所以一定要訓練佢哋可以被某啲信任得過嘅人攬攬抱抱而唔會爭扎。只要從哥基細時起，間唔中用自己身體蓋過佢哋全身，尤其係佢哋全down呢個最脆弱(vulnerable)嘅姿態下輕輕壓上，短時間唔俾佢哋逃走，等佢意識到信得過嘅人係佢哋alpha(領袖)，咁就可以慢慢訓練到佢哋，我到依家都間唔中同Blaze喺地下玩，然後壓下佢等佢唔好忘記媽咪係領袖架。)