Blaze喺Facebook無戶口，佢媽咪我無咁好心機攪咁多嘢！就等我喺呢度幫佢寫個profile啦。
我的名字
Blaze就好似古代啲人咁，有真名，又有別名/乳名。Blaze其實係佢嘅乳名，佢出世紙真名係“Dogwood Fully of Charm”，點解個名咁長？如果係由繁殖家繁殖出嚟嘅狗狗，個名第一個字都會係個繁殖家狗場嘅名，方便第二時競賽時啲評判同參賽者識認係邊度出品。所以Blaze嘅爸爸媽媽，兄弟姐妹及仔女，個名都係Dogwood行先架。
咁點解Blaze叫做Blaze呢？BB狗出世時，都係一團粉咁，主人多數會盡量搵啲特徵去色別佢哋，前主人話Blaze頸後一小撮白毛好似一撮火焰，咁就叫佢做Blaze！其實呢個名同佢性格唔係好襯，又成日俾人誤會係男仔，不過佢已經習慣自己個名咁多年，我哋無諗住幫佢改。
出世紙
Blaze 2007年3月12日出世(就嚟生日喇)。凡係美國純種狗出世後，主人都可以去American Kennel Club(AKC)幫狗狗登記攪出世紙，佢前主人係純種哥基繁殖同競賽專家，當然會幫佢登記。如果知道血統，更可以攞埋祖先三代嘅血統紙，好鬼認真架。登記咗嘅狗狗每次轉主人，新舊主人都要簽署換主人表格，更改登記再換出世紙。嗱，呢張就係Blaze嘅三代血統證明喇！
家庭狀況
Blaze同胎有幾多隻我唔係好清楚，上次大團聚見到同胎的一男一女，隻哥哥/弟弟Murphy都好出名，因為Murphy做咗廣告名星，舊年為一隻藥物拍咗個勁播嘅電視廣告。
Blaze自己做過一次媽媽，生咗三胎，但係喺BB兩星期大時唔覺意責死咗一隻，依家只係有一仔一女，上次大團聚見到仔仔。
我的競賽生捱
狗仔競賽分好多種，純種狗最傳統係比較標準形態(conformation)，即係電視見到狗狗跟主人行個幾個圈，被人擺上檯仔細心檢查身體外形等。另外仲有考機敏(agility)如跳欄、穿圈圈競技賽等，同埋考服從性(rally
obedience)。Blaze嘅體型比例同外貌都係標準哥基，所以前主人無當佢係寵物賣佢出去，而留番佢自己訓練去conformation。
雖然系出名門，但係Blaze無乜競賽命，佢參加過八次比賽，有小型也有很大型，但無論有幾多哥基犬同場，佢八次都係攞Reserved Queen Title，即係攞第二！前主人話攞第二就等於winner of all the losers，所以佢連Blaze贏過嘅Reserved Queen 獎牌彩條一條都無留低！其實佢只要其中一場攞第一，就夠累積分數做champion架喇。帶狗狗去參賽要用好多錢，所以Blaze成日哽頸二之後就無再出賽喇。佢前主人好唔忿氣架，因為有一次比賽後個評審走去同佢講“You have a very fine dog”，前主人呻Blaze次次攞第二做唔到champion，點知個評審話，「唉吖，真係唔好意思，其實第一第二叮噹馬頭，俾邊個都得！」真係激死佢！
不過，唔贏有唔贏好，點解？因為前主人決定退休關閉狗房後，會將狗狗搬翻入屋企養，咁就要決定留邊隻同送走邊隻。雖然前主人都好鍾意Blaze，但唔知點解Blaze同另一隻哥基女Fancy從小(幾個月)到大一直狗咬狗骨，基本上唔可以同住(上星期我哋去探前主人，佢都要全程將Fancy困喺房等佢哋見唔到對方)。Fancy亦係champion，所以要二揀一，就唯有放棄Blaze喇，亦因為咁我哋先咁好彩做佢新主人。
我的性格
唔好以為Blaze會同Fancy打交，就以為佢好惡喎。其實相反，Blaze超級純品又細膽。前主人間屋喺一條好深嘅掘頭路，四邊都係草地樹林，Blaze習慣咗好安靜嘅環境，基本上有任何聲音都可能會嚇親佢。佢嚟到我屋企住喺室內，最初對家居一般聲音都好驚，開車房門、開水喉、沖廁所、電話響等，佢聽到會跑開想搵地方呢埋。依家好咗好多唔驚喇，聽到車房門聲就知道爸爸媽咪返屋企，即刻跑去門後面等我哋開門歡迎我哋。
不過佢有一樣嘢好得意，就係鍾意收埋自己，廳套梳化個腳墊底同埋房嘅床下底嗰小小空間都係佢最愛，佢會爬低身捐入去瞓覺，但係夜晚大家一齊入房瞓時佢又會走翻去自己床仔瞓，我估佢同佢媽咪一樣，瞓覺時怕光怕聲音。前主人都話佢以前住狗房時，係唯一一隻會呢埋喺塊石屎板橋下面嘅狗狗，最初仲以為佢走失咗嚇死人！
不過純都有好處，我一開始帶佢返屋企，就可以任舞佢都得，攞佢食緊嘅嘢/玩具無問題，幫佢清潔剪指甲整痛佢都無問題，而且Blaze係任人摸都得，就算細路BB衝埋去佢度，插佢眼，扯佢毛，佢最多都係行開，但更大機會係坐定定唔郁任摸，男女老幼都啱。我有諗過俾訓練佢做狗醫生，不過暫時唔得閒。
另外佢唔會吠叫，有人按門鐘，陌生人入屋等一定唔會吠，自己唔覺意俾我哋困住都唔吠。但係佢又唔係唔識吠，因為去公園有其他狗狗凶佢時，佢會吠翻一兩吓示意「唔好惹我」！依家有時候我放工返到屋企，會引佢跳一兩吓或者吠一兩聲，令佢在意同埋興奮啲。
前主人幫Blaze搵新主人時，好介意我哋會唔會將佢變成「室內狗」，佢話未見過一隻哥基咁鍾意入屋，知道如果佢將來住喺屋入面會開心好多。前主人以前每次打開狗房門俾狗狗出草地玩時，其他狗狗會周圍跑，去吓大小便，但Blaze無論何時何地都係一個箭步飛奔去主人屋企門口，望實你叫你幫佢開門入屋，就算同佢講No話佢知唔係入屋，佢行翻出嚟一陣又會再去門口等你。有一次前主人不在家，收到朋友電話話狗房度門開咗，Blaze唔見咗好驚，前主人一知道係Blaze走失，即刻話「唔緊要，佢一定係喺屋企門口等人開門俾佢！」
Blaze依家都係好癡家架。當然出去散步，大小便佢都會去，但係佢返親屋企都好開心，一個「Yeah，返到屋企！」急不及待入屋嘅樣子。
因為我哋全日都返工，我哋前一排有諗過好唔好為Blaze養多隻年紀少嘅狗仔，等日頭佢有個伴，但我哋發覺Blaze鍾意人多過其他狗好多，去親公園佢見到人會走埋去想被人摸，但係就唔鍾意同其他狗玩，而且佢以前一直都要同好多隻哥基一齊分享一個主人，無得做「獨生女」，我哋都係決定淨係養Blaze，等佢唔駛擔心我哋會分緊啲注意力。
我的至愛
哈哈，真係要讚吓自己，好多人話異性相吸，狗仔通常癡女主人，狗女通常癡男主人，但係Blaze就最癡媽咪亦都最聽我話。跟出跟入佢只會跟我，我沖涼去廁所佢都一定跟住喺廁所門口等。平時如果爸媽都喺屋企，早晚出去大小便多數會係爸爸帶，但係爸爸成日要三催四請，叫親佢佢就走嚟望住媽咪，夜晚更要我走去門口Blaze至會跟佢出去。我就從來唔需要咁，只要我開始著褸同鞋，佢就自自動動跳奔奔跑到大門口，好興奮咁等我。
其實Blaze跟我原因都好簡單，第一，佢之前只有一個女主人，無乜同男人有緊密接觸過。第二，我老公雖然都好錫Blaze，但係Blaze係意識到媽咪愛護佢多啲，照顧佢多啲，緊張佢多啲。之前返學都只係我訓練佢，週末帶佢去公園亦都係我。狗狗好簡單，只要佢認定你係佢首領(packleader)，佢就會最信任你，對你最忠心，所以即使係佢最唔喜歡做嘅事(睇醫生，剪指甲，洗耳仔，刷牙，沖涼，落大雨去大小便等等)，由我幫佢攪會順利好多。
除咗媽咪，Blaze當然都有其他喜好！同所有哥基狗一樣，佢最鍾意食，永遠都食唔飽，我相信即使一日餵佢十餐佢都一樣食得哂。依家一日兩餐我都係俾三份之一杯狗糧佢，成年犬算少，但係佢好少運動同外出，所以就算唔飽都唔會幫佢加糧。但係我依家會俾少少小食佢，多數係蕃薯乾或者清潔牙齒嘅小食，不過Blaze都好乖，我哋食嘢佢唔會煩你，最多望吓你，而且俾粒冰佢咬佢已經好開心，好易養！
Blaze，你最緊要健健康康，爸爸媽咪一定會愛錫你，等你繼續開開心心過你未來嘅日子！
