眨眼過了的十二月

今年十二月，因為中間去了加州一星期玩樂公幹畢業禮等，元氣大傷，令餘下的日子都集中在休息康復中，所以 ……

兩公婆都忘記了12月21日的結婚週年紀念，今年還是五週年呢！當日在辦公室無聊查看FB，契妹留言祝結婚週年快樂，不禁「噢」一聲！立即致電回家問老公：「今天是什麼日子？」他當然也是毫無頭緒！

大家不要見怪，這已不是我們第一次忘記結婚週年日子，記憶所及好像只有一年是有特別慶祝的。其實我倆都不是特別注重紀念什麼日子的人，什麼結識日子，開始拍拖日子等全都不記得了，剛來的頭兩年我老公把我的生日也記錯呢！幸好我們都不會為這些事情不高興，如果其人一個很介意也是相當煩惱的！

結婚週年忘了，今年的聖誕禮物也完全沒有準備！幸好兩個女兒都大了，今年就每人買張卡送現金，舅父姑姐等網上訂購禮物籃，但老爺奶奶仍是令人頭痛萬分的，今年就在12月21日晚上吃完週年飯後趕在商舖關門前亂買了幾樣，老公自己揀了一件恤衫作自己的禮物，我就一早要他買了Dyson 的手提吸塵機，因為平時自己想要什麼也買夠了。

聖誕節就這樣匆匆忙忙的過了，到最後還是沒趕及買禮物給嫲嫲呢！12月除了聖誕節一天公眾假期也沒有取過一天假，照這樣的走勢，我1月初生日也應會在無聲無色的景況下渡過，因為你問我想要什麼想怎樣慶祝，我也沒想法啊！。

 

Blaze：各位，聖誕快樂

Blaze祝各位：

聖誕快樂！新年快樂！

槍械管制沒有用

美國每次發生校園槍擊事件，就會聽到加強槍械管制的聲音。

有用嗎？

保障人民備有及佩帶武器的權利，是美國憲法的一部份，這條在1791年訂立的第二修正案“Second Amendment”，重要性慬次於第一修正案，即保障美國人有信仰、言論、出版、集會、請願自由那一條。

對於生長在香港，連自身軍隊也沒有的香港人，這顯然是很難理解。但人民可以擁有槍械，是美國二百多年歷史的一部份，是美國獨立自主精神的一部份。你要是想生活在美國，享受美國美好的一面，這附帶條件是必須要接受的。住在高樓大廈的香港人可能不明白，美國大部份家庭(我指的不是住在加州紐約的華人家庭)，很多都是住在叫天不應，叫地不聞的地方，在家藏有槍械保護家園及家人是很常見的事。

有些事，有些歷史，無論主觀意願如何，是不能走回頭的。

忙碌的一週

上星期六晨早五時，起床趕第一班機到加州灣區，為的是週一二到總公司開會及探訪，我提早兩天到，當然是為了見朋友，吃吃喝喝，及完成很重要的剪頭髮任務。

加州時間中午落機後，多得口水禧一家車出車入，先剪髮。原本約了呔仔一家，但呔爸病倒了大昏迷，連小朋友也開始有患病症狀，我們當然叫他們多休息(其實是怕被他惹病大家嘛！)。下次再見！

晚飯吃到雲吞麵凍奶茶，豬皮魚蘿蔔，還有海南雞，好滿足啊！回去後還霸佔口水禧睡房一晚呢。

我到加州的另一要求是飲茶，星期日在茶樓為了口水禧等了半天的馬拉糕，我差點嚇死隔離檯的爸爸。因為突然在左邊遠處好像聽到點心姨姨說有馬拉糕，我一時興奮頭轉過去在那爸爸耳邊大叫「有馬拉糕呀！」他整個人彈起，哈哈，真不好意思。

禧家很有「為人為到底，送佛送到西」的助人精神，飲茶後就繼續老遠送我到將會連住幾晚的酒店，來來回回幾個鐘頭呢！招呼周到又管接管送，禧媽，下次再打攪喇！

Blaze: 我的….龍床 = 狗竇

各位哥哥姐姐，又係我呀，大家都知道我比媽咪啲發噏風受歡迎好多嘛！

話說，我喺屋企有兩張床仔，一張就係喺廳大家成日見到嗰間狗屋，入面有個軟墊，係媽咪另外買嘅，我都幾鍾意呢張床墊架，日頭無人時多數喺入面覺覺豬。

但我係跟尾狗，爸爸媽咪夜晚返睡房瞓覺，點可以掉低我？一定死跟啦， 所以睡房有另外一張床。平時我係等爸爸媽咪都上哂床熄燈喇，我先上床仔瞓覺架。

但用咗年幾，因為我有時流口水之類，張床又唔可以拆個套出嚟洗，媽咪話污糟要換喎，而且佢想買過張長啲嘅床，等我鍾意時可以坦蕩蕩打橫瞓都得。

於是有一日，我見媽咪抬住張又大，個樣又豪嘅龍床返屋企，我即刻雙眼發光高興到跳跳紮，佢由車房一入屋都行唔到兩步我就飛撲埋去，媽咪一放低張龍床，你睇吓邊個第一時間新屎坑？

當媽咪想拉張床近啲梳化，我啋佢都傻，死命坐實唔郁，佢放棄之後我就左瞓瞓，右瞓瞓，試哂唔同部位先！唔駛問亞貴，媽咪都知我鍾唔鍾意新床仔啦！

其實有新床仔比較，媽咪先知原來我可能唔係咁鍾意張舊床，因為佢發現，新床入咗睡房之後，我依家每次跟住媽咪出出入入睡房，都第一時間跳上張床度，依家等媽咪沖涼，我唔會再呢埋入床下底，而係好梳呼咁攤喺床仔等。媽咪話以前張床前面都有包住，我可能唔鍾意跳出跳入喎。點都好啦，我依家當張床係寶就真嘅。

瞓咗兩晚，有朝媽咪朝早摸我同我講早晨，突然覺得我啲毛毛有啲凍，以前唔會咁架，因為以前張床仔啲質地有保暖功能，瞓住會暖笠笠架。媽咪唔想我冷親，於是……

媽咪每晚幫我“襟”完披，我就會乖乖唔郁，見到我咁樣，媽咪笑住話，你係咪當自己係人仔嚟架？邊有狗仔好似你咁咁鍾意襟披架！

見到我咁鍾意張龍床，媽咪同我一樣咁開心！

 

哥基產品

來一篇短短的網誌吧。

有時見到可愛的哥基產品，我都會買回來，但我相信不會養成習慣，因為我很怕家裡有雜物，尤其是沒實際用途的東西，這幾件體積細細而且都有用，還可接受。

第一件是杯墊，隻哥基的樣子雖然比較古典，但實物質素好，好重手。

第二件是memo紙連座，我很喜歡照片前端的哥基樣子似我家的Blaze！

第三件是2013年月曆，每個月的哥基顏色或表情也不同。

Blaze：我最近好紅

橫掂連續幾個blog都係我做開主角，咁就唔好俾佢停！YEAH！

媽咪話，佢無生小朋友，就將啲母愛俾哂我喎，你睇，佢學人哋啲媽咪咁幫我整月曆呀！

月曆封面梗係我笑哂口祝大家2013年快樂啦！

有幾個月無登出嚟，因為有媽咪爸爸同我一齊影嘅相，其餘嗰啲登哂出嚟喇。

媽咪印咗一式兩份，諗住一個放屋企一個放公司，除咗媽咪之外，無其他人想要架喇，嘻嘻！希望下年又可以儲夠相再整多個啦！

多謝欣賞！

Blaze：我的怪習慣

又係我呀！媽咪話我比較受歡迎，要多啲出場。

我係一隻好乖的狗狗，從不吠叫，從未試過大小便出意外，又未試過咬爛嘢，爸爸媽咪有時唔得閑過哂餵飯便便時間我都唔會亂嘈亂走，真係人見人愛架！
不過媽咪話，如果我形象太完美，咁就好似過份咗啲，所以要揭我私隱，將我兩個怪習慣公諸於世喎。

1) 用生命測試媽咪記性

媽咪通常只會喺兩個地方食飯，一係梳化，一係細飯廳。我好乖，唔會跳起或者亂叫問媽咪攞嘢食(媽咪都唔會俾)，但我係十足跟尾狗，媽咪去邊我都跟住，如果媽咪坐梳化，我就會伏喺梳化底媽咪腳邊。

但如果媽咪坐細飯廳，我就會做一樣「藝高狗膽大」動作，嚟表達我對媽咪嘅一級信任度，你哋睇吓！

要癡住媽咪，梗係有咁近坐咁坐啦。媽咪一坐定食飯，我一係爬喺媽咪張凳後面，一係爬喺佢凳底。你見唔見張凳有碌碌呀！如果媽咪唔記得我喺佢腳底而突然起身攞嘢，甚至只係向後郁一郁，我都會俾佢「車」到架！

就算有其他人一齊食飯，我都只會靜靜坐喺媽咪凳底。媽咪成日鬧我，如果有一日唔記得或太興奮向後郁，「車」鬼死我喎。媽咪，我好信任你架！有時媽咪確定唔到我坐喺邊個位，個頭喺邊度，佢食完飯要起身時就會一邊叫我，一邊好慢好慢向後移少少，等我知道要行開俾媽咪起身。

2) 我的保險箱

我都幾得寵架，成日都有玩具玩。但如果買毛毛會發咇咇聲嘅公仔俾我，我就會第一時間咬咬咬，咬開哂啲毛毛，再搵個咇咇出嚟咬爛佢，咁就玩完架喇，通常十分鐘必定攪掂。

雖然咁玩法係唔慳家，但媽咪知道我鍾意咁玩，都仲會買新玩具俾我架。不過我最唔鍾意就係咬完之後，媽咪就會執起哂啲屍骸掉落垃圾桶！媽咪，幾爛都好，啲玩具係我架，你做乜掉哂佢喎！

依家我醒目好多喇，所有玩具唔理咬唔咬得爛乜種類都好，第一時間收埋媽咪床下底，最好仲係收到中間，咁就好安全喇。你睇吓，我啲寶藏呀！

嘩，媽咪你做乜爬底望床下底呀？你想點呀？你乜都見唔到，乜都見唔到！

(媽咪後話：傻瓜Blaze，媽咪其實一直知你收埋啲玩具喺床下底啦！雖然好窄，但媽咪真係要爬都爬到去中間架，不過見你當啲爛玩具如珠如寶，又唔阻住地方，媽咪隻眼開隻眼閉啦。)

 

Blaze：我日行一善！

各位哥哥姐姐，好耐無見，係咪好掛住我呢？

其實我生活都係咁上下啦，無病無痛食得瞓得，不過唔太鍾意俾媽咪影相，所以你哋少啲機會見到我囉。

上星期六，我去做善事呀，係咪好叻叻呢！其實係咁嘅，American Cancer Society喺美國唔同地區嘅公園，有一項活動會俾狗狗同主人參與，叫做Bark for Life，主人俾少少錢，就帶埋狗狗去參加，主要係行公園一個圈叫做步行籌款咁啦。

今年天氣好好呀，唔熱又唔凍又有太陽。除咗行個圈，唔同地區會有唔同活動，我哋呢度就有警犬示範，扮嘢比賽，同埋俾狗狗試玩競技(agility)，媽咪見我未試過，即刻同我登記。

等咗一輪，終於到我喇！

第一項：跳欄(hurdle)

先係媽咪跳我跟住跳，雖然我矮腳又短，但哥基彈跳力一向唔差，無難度啦！

跟住媽咪只係企喺欄旁邊，然後叫我跳，跳完有餅餅，乜都得！咁樣跳咗三兩次就無得玩喇，爸爸後來話應該試吓再跳高啲嘛！鬼唔想咩，不過訓練員姨姨已經拉我去第二度啫。

第二項：爬圈圈(tunnel)

媽咪本來想我直接去爬長圈圈，但姨姨話原來有好多狗狗好怕入圈圈，一來未見過環境陌生、二來望入去視野受阻狗狗會不安，三來隻腳一踏入去啲膠膠會發出聲而嚇親，佢話要先試短圈圈睇吓我敢唔敢入喎。

試咪試囉，媽咪話其實只要我見到聞到餅餅，可能叫我跳海都得架！得咗！

之後梗係去長圈圈啦，媽咪好想姨姨拉到最長，但係又被勸籲試吓十幾呎先喎，仲話如果我唔肯走去陌生嘅姨姨度的話，就要調轉跑去媽媽嗰邊。

知我Blaze者莫若媽咪！第一次喺圈圈口，入面黃咁咁又乜都睇唔到，我有啲猶豫，媽咪第一時間掉粒餅餅入圈圈中間，我諗都唔諗衝入去！跟住另一邊姨姨叫我又俾我見到小食，唔駛諗啦！你見唔見我一去到逗雞眼哄埋姨姨度呀，等小食嘛，快啲快啲！

之後再試咗兩次都ok，最攪笑係最後一次終於由姨姨嗰邊跑去媽咪度，我一開步姨姨已起身走人準備去另一項，但係我去完媽咪度即刻又轉身去搵姨姨。點解？因為姨姨啲小食唔係普通餅餅，係好味牛肉乾！我平時無得食架，梗係邊個好味啲去邊度啦！

第三項：靜止箱(pause box)

媽咪叫我跳上個箱度，我同媽咪都唔知為乜，返到屋企查電腦至知原來係俾競賽興奮中嘅狗狗要突然安靜坐低唔郁。

坐緊等運到時，姨姨問媽咪我係咪試過玩競技，因為我表現好好！媽咪就解釋，其實我未試過，不過細個時係conformation競賽犬，可能有啲幫助掛！姨姨即刻明白哂，話唔怪之得我可以咁集中！(其實，一切都係同餅餅有關！你試吓唔俾餅餅，睇我啋唔啋你吖傻瓜！)

第四項：左右行棍棍(weave posts)

媽咪話佢最擔心呢項，因為在場等時，發現大部份狗狗都做唔到，主人拉拉扯扯又行又剩啲狗狗都唔明，咁又係，跟住啲棍棍左右行又真係唔太自然，所以呢樣亦係競技賽最難訓練嘅一項，媽咪叫我俾心機！

咪睇小我啦，你睇我幾勁，跟得條棍棍幾貼，仲笑哂口添！我第一次只係望住媽咪手嘅指示(即餅餅)，就可以扭哂咁多條棍棍喇！再玩多次都無問題！媽咪後來話我，最衰我咁叻女，攪到姨姨無哂癮，行完第一次想趕我走無得再玩，其他狗狗都可以玩好耐，後來係媽咪自己提出要玩多次架。(媽咪，點解叻都俾你話喎！)

第五項：搖搖板(teeter-totter)

喺被趕之前，媽咪見我有兩項未試過，即刻拉我去，其中一項係行類似平衡木，但因為佢哋只係放牌板喺地面，俾狗試吓佢哋肯唔肯踏上牌板度而無吊高到，無任何難度我唔試喇。

另一項係行搖搖板，狗狗先爬上一邊，然後去到一半因地心吸力關係牌板會向下傾銷，狗狗再行落去，最重要係牌板下降時狗狗唔會驚。在場有一塊好矮嘅，基本上同平地差不多，不過都好過無，就試玩咗一吓。(如果真係訓練競賽，會逐漸將牌板加高加長。)

咁就玩完哂喇！媽咪讚我好叻女呀！YEAH！

玩完一陣，就到狗狗步行喇，你睇吓，閑閑地有成100隻狗狗架！原本我哋行包尾架，咁我就係咁扯媽咪，媽咪唯有喺側邊跟住我快跑，終於跑到差不多最前，少咗好多狗狗喺周圍時，我至放慢步伐慢慢行，媽咪話我麻麻煩煩唔鍾意包尾！

就嚟行完喇，停低影張靚相先！

咁難得帶大相機天氣又好，媽咪靜靜雞放張我同爸爸一齊嘅開心肉照。嗱，唔好話俾爸爸知佢出鏡呀，佢唔知道架！

媽咪，有得玩又有咁多餅餅食又可以做善事，我今日好開心呀！下年記住再帶我嚟呀！

  

同住一定難

自去年六月，大繼女(以後都簡稱「大女」吧)完成西班牙交換生計劃之後，就搬了回家跟我們住。

先講一下我自己的缺點，我很怕跟人同住，自大學畢業後，除了跟前夫仍在一起的一年，其餘十幾年來我都是一個人住的，即使當中大部份時間我都有不同的男朋友，而且每一個都是自己住，我亦沒有為方便或慳錢而與任何一個同居。

我喜歡獨居，因為我覺得「家」應是一個最舒服、最自在的地方，不用理會任何人，不用向人負責，不用向人交代日常習慣行程。什麼時候起床、什麼時間吃東西、看什麼電視、一日上網八小時等，通通不用向人交代。而且我是一個睡眠質素不好的人，睡房一定要漆黑一片沒任何聲音，不想身體接觸到其他人，而且氣溫要很低(我在香港時為了恆溫一年四季睡覺都開冷氣)。最重要是，我本身是很不關心別人起居的大懶人，實在不想動腦筋去照顧及理會任何人(包括伴侶)的起居飲食，但如果有人在我家，我又做不到不理會他(們)。

我亦有幾個怪習慣，第一就是我在家穿得很少，這跟我一向不喜歡帶手袋，從不帶手錶，不喜歡冬天要穿厚衣服的個性貫徹始終，總之不想身上有東西「癡住」。我一個人住時，大部份時候只穿內褲，亦因為這樣，在香港時我都會把所有鄰居可看到的窗戶拉上窗簾。另一習慣就是「只有有機會看我裸露的人，才有機會看到我素顏」。自17歲起，無論上學上班週末出街，我每天都會化妝，回家後脫下衣服落妝後，就是我最舒適、最自在的享受時間。我過去十幾年，都是這樣過的。

從以上種種看來，現在跟老公及大女同住的安排，簡直連我自己也嚇了一跳，起碼現在在家每天都要穿衣服！可能人的適應能力，真的比想像中要強。

這篇主要講大女，就先不提與老公同住的磨合吧。

網購繼續(更新)

一到冬天，我買衫的意欲就會減低，因為我較不喜歡冬天的衣服，顏色深沉之餘，又因要保暖功能款式都比較普通。在美國室內都有暖氣，大褸內不能穿太多，一件背心內衣跟一件薄線衫/冷衫已綽綽有餘。

以下這些都是最近買的，大部份都不是冬天衫，是的，我是一年四季都買夏天衫的！

買極都買不完的連身裙，藍的那一條較貴，買時已預計如果稍有不滿就退回，但穿上身後好靚(不是我靚，是條裙靚)，裙擺的設計又特別，決定留下。綠色那一條，是要開始買多一點「成熟」(亦即與我年齡符合)的衣服，減少買「少女款」的衣服。我喜歡綠色但比較少綠色的衣服，裙背後的交叉性感得來又不暴露，難得！

之後又是花花褲，我之前已買過一條(看此文)，非常舒服又易襯，最近見到這一條顏色更夏天，而且勁減價至廿多美元，即買。

另外幾件第一件單邊袋外套可上班時穿，襯半截裙夠斯文，襯件仔褲夠型。第二件是一件復古的lace斗篷，買了這麼多裙，覺得要買些百搭的外套陪襯。很喜歡這件斗篷，即使內裡只穿件背心加牛仔褲也可。第三件黃色短身外套看來普通，我在初秋時常著，怎料好評如潮，不論朋友或街上陌生人都讚賞過。

最後一批終於到冬天服。

每年一到秋冬，這裡會下幾場雨，一下就會凍十度八度，然後氣溫就會下降，所以我一直想買一件：1)可以保暖、2)可以擋風雨、3)外型不是運動/滑雪型，而是較女性化的外套。找了幾年，終於讓我在一個英國牌子找到了。它們網頁的照片顏色不夠亮，我在綠/白色與藍/紅色兩件中下不了決定，因退貨不用郵費，最後兩件也買了等我見到實物才作最終選擇。如我所料，藍/紅色那件實物沒有那麼暗淡，較合我的心意。在試穿時剛好繼女也在家，我覺得她會喜歡綠/白那件，而她亦一直好想找能保暖的雨褸，我又懶得退貨最後就把另一件送給她，最近見到她常穿著，看來她也很喜歡。

還有這些每年都要買的線衫冷衫冷裙，沒什麼喜愛與不喜歡，總之冬天就要買些替換。

颶風「桑達」與香港颱風的不同

看了幾日颶風桑達的新聞，很多人(尤其經常經歷颱風的香港人)不明白為何一個一級颶風(美國最低是一級，最強是五級)，會造成這麼嚴重的人命財物破壞。

我就在這裡作一個簡單的比較吧。

近年襲擊香港最強的颱風是1999年9月懸掛, 做成2死逾500人傷的「約克」, 當年打破了懸掛最長時間十號風球的紀錄(11小時)。

先比較一下簡單的數據：

最高風力： 約克80.7mph 桑達 90mph(登陸後是85mph)

最低氣壓(氣壓愈低，風暴愈強)： 約克976millibars 桑達959 millibars

降雨量：約克 總雨量284mm(11吋) 桑達覆蓋太大，目前為止New
Jersey最多12吋  Delware最多10吋

以上只是目前我找到的一點數據，香港的一個十號風球，看來跟美國的最低級一級颶風差不多。但風並不是造成大破壞的主要因素，水才是！大家記得南亞和日本海嘯吧。

桑達的恐怖之處，是其覆蓋面積之大而行動又緩慢。桑達面積大多大？直徑1000英里！1000英里有多長？你知道香港陸地邊界由東至西有多長嗎？...... 18英里！這個颶風的直徑是香港長度的50倍。

桑達後期移動速度增強至每小時20英里，若我估計沒錯，要一個1000英里直徑的大圓圈由一邊走到另一邊，前後也要50小時，即使颶風邊緣地方風力不強，還是要用上一天以上吧，而且雨是不停的下呢！所以到今天星期三了，桑達已登陸了兩天，美國內陸其他州仍受她的風和雨影響。

只是下雨也沒什麼可怕之處，叫得做Frankenstorm，一定有其驚嚇之處。桑達登陸的週一晚上，剛好是潮水上漲的時間，潮水漲也沒有什麼大不了，每天也漲一兩次呀！最慘星期一亦是月圓初十五(約克登陸那天是初七)，是每月最高的大潮，加上一個超級大面積颶風，加上不停的降雨，造成今次風暴最大的破壞，是storm surge(又名風潮或風爆海嘯)。

美國紐約曼哈頓區、新澤西州沿岸(如大西洋城)受嚴重破壞，都是因為storm surge，那並不是大浪一次次拍岸的衝擊，而是潮水持續高漲到像海嘯一樣入侵水平線以上的地面，而且這是長時間的入侵，風暴未走、潮漲時間未過，水不會退。

香港為何不會這樣？香港迎面受風的方向是港島東南及南面，南區有什麼？南區沙灘後是一座山，風經過一座山已不會出現storm surge，維港兩旁一定不會受影響，偶爾也只是海怡半島及杏花邨這些迎面風眼位大浪一點。

你又可以問，紐約新澤西州為什麼要在沒遮沒擋的受風位建高樓大廈及住宅？其實，紐約及新澤西一向不是颶風正面襲擊的路線，平常的颶風，基本上走到最北到我住的州(北卡)就會登陸，我們東南邊面對颶風的經驗多很多，準備也充足得多。如果你將地球當一張地圖一樣打橫放，紐約新澤西的緯度就跟北京差不多，你見過打風打到北京天津那麼北的地方嗎？你也不會期望這些地方會一直為storm surge作準備吧，這次在美國也是百年一見啊！

其實東北面各州的州政府要求沿岸所有居民強制撤離，已大大減少人命傷亡，要知道要強制撤離所有Lower Manhattan及新澤西沿岸數以十萬計的居民有多難？大家也記得沙氏時的淘大花園吧。紐約皇后區Breezy Point一場火一晚燒了超過100間屋，暴風令猛火一發不可收拾，但因為當時正水浸消防車不能進入，若不是居民都聽話一早撤離了，沒有一人死傷根本不可能。現在發現的死者其實有部份也是枉死的，例如在風暴時出外拍照觸電死，不肯撤離而在家浸死等。

美國打風的另一大影響，是停電。桑達襲擊高峰期，美國大約有800萬人受停電影響。美國地大物博，供電的電纜不可能像香港般埋在地底，因為成本上做不到。地面上的電線杆受強風大雨長時間襲擊又或者被倒塌的大樹打中就會倒下，供電就會停，電話/互聯網情況一樣。現在我們南面晚上氣溫只有攝氏2-3度，北面更冷。水，可能再過幾天就會退；電，應該要更長的日子才能恢復供應。

美國東北地區在風暴後兩天已逐漸回復正常，我自己就覺得值得自豪。