我心目中的男神

抱歉用了廣東話，這一篇其實想寫好多年，但總係未能的起心肝動手。

大家心目中的男神係邊類型？又有無隨著時日改變？我所指嘅係公眾人物，例如演員歌手等。

我發覺我由細到大，覺得靚仔，覺得有型或有魅力嘅男人，都係一個類型，睇嚟我都幾忠心。

先旨聲明，我年輕時係八九十年代，我以下寫嘅幾個男神，可能對於一啲讀者嚟講係阿伯級人物！

初中時我已經崇洋，對香港嘅明星歌星無乜特別感覺(我從來都唔覺劉德華郭富城吸引)，但係一套荷里活電影「殺戮戰場」(Platoon)，令我迷上當年21歲的Charlie Sheen。套戲好睇佢演技又唔差當然係有加分，但當年14歲的我，真係覺得Charlie Sheen巧靚仔。呢套戲我當年入戲院大大話話睇咗6-7次，好在當年有個同學同我一齊鍾意佢肯陪我癲。嗰時仲會用僅有嘅零用錢買有佢出現嘅雜誌！

之後一年佢又有第二套電影出，叫No Man’s Land，係講臥底警探潛入保時捷跑車偷車集團嘅故事，我估無乜人睇過。但我細個嘅dream car係保時捷911，而且又有佢做主角，當然會去捧場！

之後到大學時，雖然我無乜特別留意呢個人嘅作品，但有一段短時間我覺得年輕時嘅金城武好型又靚仔。其實90年代日劇好紅時，都有好多女仔迷上竹野內豐、木村拓哉，但我淨係覺得金城武得，可能佢個樣同佢形象都有神秘感，我覺得特別型。

但我咁大個女，令我真係會去買張巨型海報貼喺房嘅，至今只有一個人，就係Keanu Reeves，94年電影Speed上映，我剛好喺美國探我host family就一齊入場睇。我之前都睇過佢好多電影，例如Dangerous Liaisons、Point Break、My Own Private Idaho、Little Buddha等等，但除咗覺得佢青靚白淨同埋演技麻麻之外，就無乜印象。但係睇完Speed，雖然佢演技都係無乜進步，但我就突然覺得佢超靚仔有型，返香港之前仲去買咗張超超巨型海報(下圖)，大學四年級自己租房住時，就貼咗出嚟。(當年我已結婚，唔知我前夫有無覺得奇怪！)

99年The Matrix上映後，我更加覺得真係無其他人可以做Neo(即使佢演技仍然好屎)。雖然有時私下有啲不修邊幅，但Keanu Reeves亦係暫時唯一一個，我覺得即使人到中年之後，仍然覺又型又靚嘅男神。

最後一個就係Clive Owen。呢個可能唔係太多亞洲人認識嘅英國演員，佢早期嘅作品我都唔係睇過好多，只有佢做閒角嘅Gosford Park同埋The Bourne Identity，對佢無乜印象。但係2004年一套Closer，令我深深覺得佢型爆燈！當然佢個角色係四個主角之中最討好最吸引係有好大幫助，但係我真係覺得由佢演先至演繹到咁型又有幽默感。你可以話佢唔靚仔，但佢個樣好有男人味。可能後生女唔明白，但對於我呢個中年婦就超搭糖。我覺得佢其實好適合做James Bond，但佢揀戲有佢獨特風格，我估佢都唔想做James Bond。

以上就係我近廿年嚟，覺得有吸引力嘅男神喇。我發現其實佢哋都有啲共同點，無論乜國籍，都係深髮深眼色，我依家個老公都係。唔知點解我對金髮男眼一直都無乜興趣，雖然Brad Pitt或者未甩頭髮前嘅Jude Law都有好多人話靚仔，但同我就唔通電。

另外，我鍾意五官靚得嚟，要有啲男人味，我覺得依家好流行臉小小尖尖瘦瘦嘅 款太女性化，我都係鍾意男人jaw line明顯啲。所以細臉大眼如Johnny Depp呢啲樣我又係無乜感覺。

如果你問我，我哈韓都哈咗兩年，有無乜心水男星男偶？我諗咗一輪，都無乜特別邊個令我心動。當然韓國娛樂圈有好多好多靚仔、小鮮肉，我多數只會覺得佢哋好可愛或者皮膚白淨五官分明，但係大部份對於我嚟講都唔夠男人味。呢個都唔關年紀問題，可能我自己比較喜歡面部有啲粗獷味，而韓星多數走精緻派。

如果真係要揀一個，我會揀金在中，不過唔係因為同我有異性相吸，而係我係以一個純欣賞角度去欣賞佢輪廓。因為佢個樣真係同日本漫畫啲主角好似，皮膚白無瑕疵，大眼鼻又直又尖，嘴細但唇厚，唔理乜國籍，唔好話男人，佢比好多女人更靚更精緻。我見親佢啲相就會覺得好神奇，懷疑佢係咪真係漫畫跳出嚟。不過佢以前俾人一個較女性化妖艷或性感嘅形象，可能因為佢以前表演時，為咗配合走搖滾風會化好濃妝。

佢依家入伍做緊軍人，捱咗年半仲有半年就走得。佢有參加軍中嘅樂隊，有時會為唔同場合做公務表演。前幾日係韓國紀念二次大戰戰勝日本嘅光復節，佢有份出席一個戶外演出。韓國軍人係無論任何時候都一定唔可以化妝嘅，所以有時會見到啲入咗伍嘅藝人個樣唔同哂。但你睇吓佢無化妝個樣？一樣成個公仔咁眉清目秀唇紅齒白。最神奇係做咗軍佬成兩年皮膚都係咁白，因為佢軍樂隊嘅參與只係一個附加任務，平日佢一樣要做其他軍人做嘅所有職務架(例如操練/守營/去戶外做清理工作等)。

入伍之後，佢同其他當紅藝人一樣，因為進食休息正常翻，已經重咗二三十磅，不過佢係非常自律嘅運動狂，唔會好似其他藝人咁由得自己變肥等退役至減，佢將啲磅數變哂肌肉，著埋軍服真係男人味十足，有無見過咁型嘅軍佬？

入伍之後，因為佢本身性格隨和又友善，多咗好多男飯，我有見過佢喺軍隊內部表演嘅錄像，有軍佬做哂有佢名嘅花牌為佢叫囂應援，好攪笑架！依家軍隊內都有流行笑話，就係如果睇唔到女團演出，有得睇金在中都好！不過以佢輪廓，我估佢都無可能達到我喜歡嘅粗獷性標準，但係加埋身材性格等等，佢都好接近成為我心目中嘅男神喇。